Британиянинг атроф-муҳит масалаларига ихтисослашган Тҳе Эартҳ Тимес интернет-журнали Орол денгизи муаммоларига бағишланган «Марказий Осиёда экологик муаммолар» номли мақолани чоп этди.
Мақолада Орол фожиаси бўйича фактлар келтирилган бўлиб, жумладан, бу ерда аввал яшаган балиқ турларининг кўпчилиги қирилиб кетгани, Мўйноқ каби чегарадош ҳудудларда эса ҳаётни таъминлаш тизими издан чиққани таъкидланган. Орол денгизи қуришда давом этаётгани туфайли, ушбу оқибатларга барҳам бериш қийинчилик туғдирмоқда.
Журнал Ўзбекистон ва қўшни давлатлар халқаро жамоатчилик кўмагига эҳтиёж сезаётганини қайд этган. 2010-йилда БМТ Бош котиби Пан Ги Мун зарар кўрган ҳудудга ташрифи чоғида Орол денгизи муаммосининг дунёдаги энг даҳшатли экологик фожиалардан бири эканини таъкидлаб, муаммони ҳал этиш учун бутун дунёни жалб қилиш зарурияти борлигини айтган. БМТ агентлиги Ўзбекистонда 2012—2015-йилларда «Орол денгизи кризисидан азоб чеккан аҳоли ҳаёт фаолиятини таъминлаш» дастурини амалга оширмоқда.Шунингдек мақолада БМТ Тараққиёт дастури ҳам бу борада Ўзбекистон билан ҳамкорлик қилаётгани, натижада 2001—2011-йилларда ҳудудда болалар ўлими икки марта камайгани, бироқ шундай бўлса-да, Оролбўйи ҳудудлардаги болалар саломатлиги хавф остидалиги таъкидланган.
Муаллиф Ўзбекистонда Орол қуришининг салбий оқибатларига қарши 1990-йилдан буён юздан ортиқ дастур ва лойиҳалар олиб борилганини ёзган. Орол бўйида 5,5 миллион гектар майдонни эгаллаган Оролқум туз чўли вужудга келган, деб ёзади у. Йилига Оролдан ҳавога 75 миллион тоннадан зиёд заҳарли чанг кўтарилади. У Помир, Тян-Шан ва ҳатто Арктика музларида борлиги аниқланган.
Изоҳ (0)