2014-йил 1 апрел куни «Ўзбектуризм» Миллий компаниясида Туркия Республикасининг Ўзбекистон Республикасидаги Фавқулодда ва Мухтор Элчиси Намик Гунер Эрпул билан учрашув бўлиб ўтди. Бу ҳақда «Ўзбектуризм» матбуот маркази хабар берди.
Турк томони ташаббуси билан ташкил қилинган учрашув чоғида Ўзбекистон ва Туркия ўртасида сайёҳлик соҳасидаги ҳамкорлик масалалари кўрилди.
Бундан ташқари, туризм секторига ТИCА томонидан техник ҳамкорликни, тўғридан-тўғри инвестицияларни жалб этиш, кадрлар тайёрлаш бўйича фикр алмашилди.
Намик Гунер Эрпулнинг таъкидлашича, ўтган йили Туркиядан дунёнинг турли мамлакатларига жами 75 миллион киши саёҳат қилган. «Ушбу ташрифларнинг 1 фоизи Ўзбекистонга йўналтирилса, бу икки мамлакат ўртасидаги сайёҳлар оқимининг кескин ўсишига сабаб бўлади», — деди у.
Шунингдек, Туркия элчиси «Ўзбекистон ҳаво йўллари» МАК нинг Тошкент—Истанбул йўналишидаги авиарейсларини кўпайтириш зарурияти ҳақида гапирди. У яна Туркияни Самарқанд, Бухоро шаҳарлари билан боғловчи тўғридан-тўғри рейслар ташкил қилиш таклифи билан чиқди.
Музокаралар чоғида кўрилган масалалардан яна бири ҳар иккала мамлакатдаги туризм соҳаси вакиллари ва талабалари учун Туркия ва Ўзбекистонга инфотурлар ташкил қилиш бўлди.
Изоҳ (0)