2014-yilda Surxondaryo viloyatida 2 500 tonnadan ziyod baliq yetishtirish rejalashtirilgan. Buning uchun 25 yangi baliqchilik xo‘jaligi tashkil etilib, tijorat banklari tomonidan 300 million so‘mga yaqin imtiyozli kredit ajratiladi, deb xabar bermoqda O‘zA.
Joriy yilning o‘tgan davrida tijorat banklari tomonidan sohaga 120 million so‘mdan ortiq kredit mablag‘i ajratildi. “Surxonbaliqnaslchilik” o‘quv-amaliyot va ishlab chiqarish majmuasi 65 million so‘m, Qumqo‘rg‘on tumanidagi “Surxonkasadka” fermer xo‘jaligi 20 million, Oltinsoy tumanidagi “Oltinsoyfarel” fermer xo‘jaligi 15 million 800 ming so‘m kredit mablag‘i evaziga baliq yetishtirish hajmini oshirish imkoniyatiga ega bo‘ldi.
Xususan, viloyatda 2012-yil 854 tonna mahsulot ishlab chiqarilgan bo‘lsa, 2013-yili 223 xo‘jalik yurituvchi subyekt tomonidan 1 266 tonna baliq yetishtirildi. “Amu-Surxon” irrigatsiya tizimlari havzasi boshqarmasi qoshidagi baliqchilik xo‘jaliklari, Muzrabot tumanidagi “Mehnat-rohat” xususiy korxonasi, Boysun tumanidagi “Qumsoy”, Sariosiyo tumanidagi “To‘palang oltin baliq”, Termiz tumanidagi “Norhamid bobo”, Uzun tumanidagi “Barotboy Mamasodiq”, Jarqo‘rg‘on tumanidagi “G‘anisher baliqchi” kabi ko‘plab fermer xo‘jaliklari yaxshi ko‘rsatkichlarga erishmoqda.
Viloyat baliqchilari 5 503 gektar tabiiy va sun’iy ko‘llarda mahsulot yetishtirib, arzon narxlarda iste’molchilarga yetkazib bermoqda. Ayni paytda yangi mavsum uchun sazan, karp, do‘ngpeshona, oq amur kabi baliq chavoqlari parvarishlanmoqda.
Surxondaryo viloyatida baliq yetishtirishning arzon va intensiv usuli joriy etilayotgani sohani moliyaviy barqaror, istiqbolli tarmoqqa aylantirishda muhim ahamiyat kasb etmoqda. Mutaxassislarning fikricha, yangi usulda baliq parvarishlash mahsulot tannarxini arzonlashtirib, aholini tabiiy oziq-ovqat bilan ta’minlash ko‘lamini yanada kengaytiradi. Bu yil viloyatda yetishtiriladigan baliqning 1 200 tonnasi istiqbolli intensiv usulda parvarishlanayotgani bunga yaqqol misoldir.
“Amu-Surxon” irrigatsiya tizimlari havzasi boshqarmasi qoshida ikkita fermer xo‘jaligi va 12 mas’uliyati cheklangan jamiyat shaklidagi baliqchilik xo‘jaligi faoliyat ko‘rsatmoqda. Yangi mavsumda ular intensiv usulda baliq parvarishlashni keng joriy etmoqda.
– Intensiv baliq yetishtirish tejamkor va qulay ekanligi katta qiziqish uyg‘otdi, – deydi “Janubiy Surxon” suv ombori rahbari Erkin Saidmurodov. – Bu usulda baliq chavoqlari ishonchli parvarishlanib, kam xarajat sarf etiladi. Joriy yilgi mavsumda 65 ming dona tez rivojlanadigan do‘ngpeshona baliq chavoqlari parvarishlamoqdamiz. Xo‘jaligimizda o‘n nafardan ortiq yoshlarning bandligi ta’minlangan.
Izoh (0)