O‘zgidromet 27-29-oktyabr kunlari mamlakat bo‘ylab havo harorati qanday bo‘lishini maʼlum qildi. Unga ko‘ra, ko‘plab hududlarda kechasi -2 daraja sovuq bo‘ladi.

Jumladan, Qoraqalpog‘iston Respublikasi va Xorazm viloyatida harorat 27-oktyabrda kechasi 2-7 daraja, kunduzi 12-17 daraja bo‘ladi. 28-oktyabrda kechasi esa 0-5 daraja iliq, baʼzi joylarda -2 daraja sovuqqacha, kunduzi 5-10 daraja iliq bo‘ladi. 

29-oktyabr, chorshanba kuni kechasi -3 daraja sovuq, +2 daraja iliq, kunduzi 5-10 daraja, Ustyurtda kechasi -2–7 daraja sovuq, kunduzi 2-7 daraja iliq bo‘ladi. 

Toshkent, Sirdaryo, Samarqand va Jizzax viloyatlarida esa harorat 27-28-oktyabrda kechasi 5-10 daraja iliq, 29-oktyabrda 0-5 daraja iliq, baʼzi joylarda -2 daraja sovuq bo‘ladi. 

Jamoatchilik faollari munosabati

Iqlimshunos Erkin Abdulahatov Toshkent shahrida issiqlik taʼminotiga qachon start berilishini so‘ramoqda. 

Mutaxassisning yozishicha, kutilayotgan harorat kamida 3 kun orqama-ketin o‘rtacha sutkalik havo harorati +8 darajadan past bo‘lishini anglatadi.

Antisiklon chekkasining bizning mintaqada 2,5 yoki 3,5 sutkagacha davom etishi inobatga olinsa, sovuqlik to‘lqini oyning so‘nggi kunlarigacha mintaqamizni sovitishi oydinlashadi. Antisiklon sovug‘i ochiq havoda bu kishilarning suyak-suyagigacha sovitish omilini berib, tabiiyki bu sovuq zahri ko‘p qavatli beton uylarni ham sezilarli “muzlashi”ga olib keladi, deb yozadi Erkin Abdulahatov.

Iqlimshunos nega bu jarayon ortga surilayotgani haqida savol qo‘ymoqda. 

Ko‘p qavatli uylarda hozir ham juda qalin kiyim, qalin paypoq bilan yurishli harorat rejimi kuzatilyapti. Kanal botiga poytaxtda ko‘p qavatli uylarda istiqomat qiluvchi aksar ayollardan xabarlar kelib tushyapti. Ular bu sovuqroq uy haroratida bolalari shamollab qolayotganini aytishmoqda. 

Maʼlumot uchun, Toshkentda 2021-yil 14-oktyabrdan, 2022-yil 24-oktyabrdan va 2023-yil 6-noyabrdan issiqlik taʼminoti uzatilish mavsumi boshlangan, deya qo‘shimcha qilgan u.

Iqtisodchi Otabek Bakirov “Gaz taʼminotiga cheklovlar kiritiladimi?”, deya savol qo‘ygan.

U Erkin Abdulahatovning so‘rovini keltirar ekan, savol bundan-da kengroq qo‘yilishi kerakligini aytdi. 

Qishki mavsum uchun vaʼda qilingan energetika tizimiga oid ssenariylar qachon eʼlon qilinadi? Gaz zapravkalaridan issiqxonalargacha bo‘lgan tijoriy subyektlardan tortib, oddiy isteʼmolchilargacha qachon va qaysi holatlarda cheklovlar boshlanishini bilishga haqli.

Biz xuddi avvalgi yillardagi kabi qishga tashvishli hadik va nomaʼlumlik bilan kirib bormoqdamiz, deb yozadi iqtisodchi.

Avvalroq, O‘zbekistonda dam olish kunlari havo yana salqinlashishi haqida xabar berilgan edi.