“Hech qaysi mashina, hatto avtobuslar ham qizil chiroqqa to‘xtamaydi” — Zangiota mahalliy aholisi

Toshkent viloyatining Zangiota tumani “Nayman” mahallasidagi 7-maktab oldidagi svetoforda “Niva” hamda “Jiguli” to‘qnashgan video tarqalgandi. Mazkur videoni “Daryo”ga ulashgan murojaatchilarga ko‘ra, aholi maktab oldidagi piyodalar o‘tish joyidan yurak hovuchlab o‘tadi. Farzandlarining maktabga o‘tib-qaytishidan qo‘rqadi. Boisi, ushbu hududdan harakatlanuvchi avtomobillar svetoforning qizil chirog‘iga umuman amal qilmaydi. 

“Niva”da yashil chiroqda chiqishimga qaramasdan, qarama-qarshi yo‘nalishdan chiqib kelgan “Jiguli” menga kelib urildi. Agar shu yerda bolalar bo‘lganda nima bo‘lardi? Yonimizdagi maktabda 200 nafar o‘quvchi o‘qiydi. Shuni o‘ylab, svetoforga kamera ham qo‘yib berishni so‘rab murojaat qilamiz, ammo natija yo‘q. Kamera qo‘yilsa haydovchilar svetofor ishoralariga amal qilishsa, mana bunday voqealar sodir bo‘lmasdi, deydi haydovchi.

YTH haqida ma’lumot bergan viloyat IIBB Yo‘l harakati xavfsizligi boshqarmasi voqea 15-oktyabr kuni soat 12:00 da sodir bo‘lganini bildirdi. 

Toshkent viloyati Zangiota tumani “Nayman” mahallasi hududidan o‘tgan D 004 Toshkent shahri — Keles — Qozoqkentsoy — M39 avtomobil yo‘lining 16-kilometrida 35 yoshli haydovchi M.Z “Vaz 2101” rusumli transport vositasida yo‘l harakati qoidalarini buzib, qarama-qarshi yo‘nalishga chiqqan holda, svetofor chiroqlariga amal qilmay harakatlanib kelgan. Shu payt ushbu yo‘lga qo‘shilish maqsadida ichki ko‘chadan chiqib kelgan 37 yoshli Q.Q. boshqaruvidagi “Niva” bilan to‘qnashuv sodir etgan. YTH natijasida “Jiguli”ning 15 yoshli yo‘lovchisi A.Z yengil tan jarohati olib tuman shifoxonasiga murojaat qilgan, deyiladi mas’ullar izohida. 

Qo‘shimcha qilinishicha, mazkur holat yuzasidan Zangiota tumani IIB YHXB tomonidan surishtiruv ishlari olib borilmoqda.

Murojaatchilarning “Daryo”ga gapirib berishicha, ular ushbu muammo yechimi uchun ko‘plab tashkilotlarga murojaat qilgan. 

Balki ishonmassiz, hatto avtobus ham ushbu svetoforga amal qilmay, qizil chiroqda harakatlanadi. Farzandlarimiz uchun ham o‘zimiz uchun ham bu yo‘l judayam xavfli, tartibga olishlarini iltimos qilardik, deydi ular. 

Aholi gapining isboti sifatida qizil chiroqqa amal qilmagan avtobus videosini ham yubordi. 

Mas’ullar faqat YTH haqida ma’lumot berish bilan cheklanmay hududda kamera o‘rnatilishida ham ko‘mak berishsa yaxshi bo‘lardi. Bu yerga kamera kerak. Kamera bo‘lsagina haydovchilar qizil chiroq ishorasiga amal qilishlari mumkin, deydi murojaatchilar.