Ichki ishlar vazirining tegishli buyrug‘i bilan Andijon viloyat Yo‘l harakati xavfsizligi boshqarmasi boshlig‘i lavozimiga podpolkovnik Rustam Maqsudxo‘jayev tayinlangan. Bu haqda viloyat IIB axborot xizmati xabar bermoqda.
Qayd etilishicha, yangi rahbarni jamoaga tanishtirish marosimida viloyat avtomobil yo‘llarida sodir bo‘lgan yo‘l-transport hodisalarining sabab va omillari, mas’ullar tomonidan yo‘l qo‘yilgan xato va kamchiliklar tanqidiy tarzda muhokama qilingan.
Rustam Maqsudxo‘jayevgacha boshqarmaga rahbarlik qilgan Abdunabi Nosirov qachon ishdan ketgani haqida ma’lumot berilmagan.
Andijon viloyat YHX boshqarmasi axborot xizmatining “Daryo”ga ma’lum qilishicha, Abdunabi Nosirov magistraturaga o‘qishga kirgani uchun lavozimidan bo‘shatilgan.
Avvalroq Abdunabi Nosirov Andijon shahridagi maktablar oldida qizil chiroqda o‘tgan va piyodalarga yo‘l bermagan haydovchilar o‘sha maktablarda o‘tkazilgan yig‘ilishlar vaqtida o‘quvchi va o‘qituvchilar oldida izza qilingani haqida xabar berilgan edi.
“Bitta tajriba qildik: maktab yaqinidagi svetofor oldiga xodim qo‘ydim. Qizil chiroqdan o‘tgan haydovchini ertalab maktab o‘quvchilarining umumiy yig‘ilishiga olib boridim-da, hamma bolalarni chaqirib, ‘Mana, kecha qizil chiroqda o‘tgan iflos haydovchi, mana shuni qarg‘anglar’, deb o‘qituvchilar bilan ijtimoiy tarmoqlarga ham chiqardim. Qizilda o‘tganning 2-3 tasini olib, ertalab maktab o‘quvchilarining umumiy yig‘ilishiga olib boraman. O‘zim erinmasdan boraman. Shunday qilib olib chiqdik — kamaydi”, degan edi Abdunabi Nosirov.
Ichki ishlar vazirligi Abdunabi Nosirovning xatti-harakatlari bo‘yicha izoh bermagan.
Izoh (0)