Eron prezidenti Ibrohim Raisiy 19-may kuni halokatga uchragan vertolyot tog‘ga urilganidan keyingina yonib ketgan. Eron Qurolli kuchlari bosh shtabi aviahalokat bo‘yicha dastlabki hisobotini e’lon qildi.
Hisobotga ko‘ra, vertolyot qulashiga tashqi ta’sir sabab bo‘lmagan. Halokatga uchragan vertolyotning uchuvchisi aviahalokatga bir yarim daqiqa qolganda u bilan birga Ozarbayjondan qaytayotgan ikkita vertolyot uchuvchilari bilan bog‘langan.
Prezident vertolyoti belgilangan marshrut bo‘ylab harakatlangan va chetga chiqmagan. Dispetcherlar va ekipaj o‘rtasidagi suhbatlarda hech qanday shubhali narsa sezilmagan.
Tuman, haroratning sovuqligi va qiyin relyef tufayli halokatga uchragan vertolyotni qidirish ishlari tun bo‘yi davom etgan.
Ta’kidlanishicha, halokat joyini aynan Eron droni aniqlagan. Avvalroq Turkiya rasmiylari halokat joyi Bayraktar Akinci droni tomonidan aniqlanganini bildirgandi. Falokatga oid baʼzi faktlar hali tasdiqlanmagan, ammo hisobotda keltirilganlar ishonchli ekani ma’lum qilindi.
Eslatib o‘tamiz, 19-may kuni Eron prezidenti Ibrohim Raisiy aviahalokat natijasida vafot etdi. Mamlakat shimoli-g‘arbida Eron prezidenti va tashqi ishlar vaziri bo‘lgan vertolyot halokatga uchragandi.
Kuchli tuman va tog‘li hudud tufayli halokatga uchragan vertolyotni qidirish 10 soatdan ortiq davom etgan. Mutaxassislar fikricha, falokat texnik nosozlik yoki inson omili tufayli yuz bergan bo‘lishi mumkin. Raisiy vafoti munosabati bilan Eronda besh kunlik motam e’lon qilingan. Eron prezidentining dafn marosimi 23-may kuni Mashhad shahrida bo‘lib o‘tdi. Muddatidan oldin prezidentlik saylovlari 28-iyunga belgilangan.
Izoh (0)