Aviahalokat oqibatida halok bo‘lgan Eron prezidenti Ibrohim Raisiy 23-may kuni Mashhad shahridagi Imom Rizo maqbarasiga dafn qilindi. Bu haqda IRNA nashri xabar berdi.
Payshanba tongida Raisiy jasadi Mashhadga olib kelingan. Dafn marosimida nufuzli amaldorlar, xorijiy mamlakatlar rasmiylari ishtirok etgan.
Mashhad hokimi Muhammad-Rizo G‘aldarning so‘zlariga ko‘ra, motam marosimida Eronning boshqa ko‘plab shaharlari hamda qo‘shni Iroq, Afg‘oniston, Pokiston va Turkiyadan kelgan mehmonlar ham qatnashgan. Marhum prezidentning dafn marosimida umumiy 3 million kishi qatnashgani xabar qilingan.
Maʼlumot o‘rnida, Eron prezidenti Ibrohim Raisiy, uning tashqi ishlar vaziri Husayn Amirabdullohiyon va yana bir qancha amaldorlar 19-may kuni Eron shimoli-g‘arbidagi Sharqiy Ozarbayjon viloyatida vertolyot qulashi oqibatida halok bo‘lgan edi. Eron oliy rahbarlari Ozarbayjon yetakchisi bilan Araks daryosida qurilgan qo‘shma to‘g‘onni ochish marosimini o‘tkazib, Tabriz shahriga qaytayotganda halokatga uchragan.
20 va 21-may kunlari Tabriz, Qum shaharlari va poytaxt Tehronda shahidlar uchun dafn marosimlari o‘tkazildi. 22-may kuni Tehronda o‘tkazilgan xotira marosimida xorijiy mamlakatlardan o‘nlab yuqori martabali amaldorlar ishtirok etdi.
63 yoshli Raisiy Eron Islom Respublikasining sakkizinchi prezidenti bo‘lib, 2021-yilning avgustidan beri Tehrondagi hukumatni boshqarib kelgan.
Izoh (0)