“Daryo”da “Vazirlik jim, quruvchilar sarson: ‘Tashabbusli byudjet’ qurilishini monopoliyaga aylantirmaslik so‘ralmoqda”, sarlavhali maqola e’lon qilingan bo‘lib, unda poytaxt ko‘chalarida, aniqrog‘i, Qurilish, Iqtisodiyot va moliya vazirligi binolari o‘rtasida sarson bo‘layotgan quruvchilar mas’ullar adolatidan umid qilayotgani bayon qilingandi.
Quruvchilarning aytishicha, O‘zbekiston prezidenti Shavkat Mirziyoyev tomonidan 2023-yilning 29-dekabr kuni imzolanib, 2024-yilning 1-yanvaridan kuchga kirgan qaror ularning faoliyatida monopoliya rivojlanishiga sabab bo‘lgan. Shu sabab ular noroziligini bildirish uchun Qurilish vaziri, shuningdek, Iqtisodiyot va moliya vaziri qabulini talab qilgandi.
Muammo tahririyat tomonidan jamoatchilikka ochiqlangach, holat biznes ombudsman nazoratiga olindi. 29-may kuni biznes ombudsman devonida vakil o‘rinbosari J.Urunov ishtirokida qurilish sohasi vakillari bilan uchrashuv o‘tkazildi.
Ochiq va konstruktiv muloqotda qurilish sohasidagi mavjud muammolar muhokama qilindi. Yig‘ilish ishtirokchilari vaziyatni yaxshilash bo‘yicha qator yechim va mulohazalarni ilgari surdi. Uchrashuvda biznes ombudsman devoni qurilish sohasi vakillari bilan yaqin hamkorlikni davom ettirish va mavjud muammolarni tezkorlik bilan hal etishga tayyor ekani ta’kidlandi, — deydi bu haqda xabar bergan mas’ullar.
-T6k6uUQR.jpg)
“Daryo” jurnalisti bilan suhbatlashgan quruvchilar, xususan, Jamshid G‘oziyevning ma’lumot berishicha, voqeaga biznes ombudsman e’tibor qaratgach, vazirliklar ham quruvchilar dardini eshitgan. Muammoni yechgan.
Eski tartibga qaytildi, onlayn savdoga chiqarilayotgan “Tashabbusli byudjet” qurilishlari uchun yana ballni chegirib qolish tartibi joriy etiladigan bo‘ldi. Muhimi, vazirliklar, mas’ullar biz quruvchilarning muammosiga jim qarab turmadi. Buning uchun ularga tashakkur, — deydi quruvchi.
Shu o‘rinda bir mulohaza: “Daryo” tahririyati O‘zbekiston Respublikasi Qurilish va uy-joy kommunal xo‘jaligi vazirligi axborot xizmatiga muammoga e’tiborsiz bo‘lmagani uchun tashakkur izhor etadi. Iqtisodiyot va moliya vazirligi axborot xizmati esa holatga e’tiborsiz bo‘ldi. Tahririyat jurnalistining takroriy murojaatlariga javob ham bermadi. Shu sabab “Daryo” AOKA mas’ullariga murojaat qilib, vazirlik axborot xizmati xodimlariga jurnalistga o‘z vaqtida javob berish yolg‘on va noto‘g‘ri axborotlar tarqalib ketmasligining oldini olishga xizmat qilishini eslatib qo‘yishlarini so‘raydi. Zero, vazirliklar tarkibidagi axborot xizmatining asosiy vazifalaridan biri shu. Ular bu ish uchun maosh oladi.
Izoh (0)