Xitoyning Sino Road and Bridge Corporation korporatsiyasi O‘zbekistonda transport infratuzilma loyihalarida ishtirok etishga qiziqish bildirmoqda. Bu haqda Transport vazirligi matbuot xizmati xabar berdi.
Ma’lum qilinishicha, 2-aprel kuni transport vaziri o‘rinbosari Jasurbek Choriyev ushbu korporatsiyaning xorijiy bo‘limi ijrochi bosh direktori Djimmi Chang boshchiligidagi delegatsiya vakillari bilan uchrashdi. Tomonlar transport sohasidagi investitsiya loyihalarini amalga oshirishda Xitoy kompaniyasining ishtirok etish imkoniyatlari yuzasidan fikr almashdi.
Jumladan, Djimmi Chang Sino Road and Bridge Corporation korporatsiyasi temiryo‘l, aviatsiya va yo‘l xo‘jaligi infratuzilmalarini rivojlantirish loyihalarida ishtirok etishdan manfaatdorligini bildirgan.
-KqvjelFx.avif)
Jasurbek Choriyev Sino Road and Bridge Corporation korporatsiyasiga Toshkent, Samarqand va Qo‘qon shaharlarida joylashgan temir yo‘l vokzallarini davlat-xususiy sheriklik asosida modernizatsiya qilish va boshqarish loyihasi hamda transport sohasidagi boshqa istiqbolli loyihalarda ishtirok etishni taklif qildi.
Uchrashuv yakunida transport vaziri o‘rinbosari muhokama etilgan loyihalar yuzasidan Sino Road and Bridge Corporation korporatsiyasiga har ikki tomon uchun manfaatli bo‘lgan aniq takliflarni ishlab chiqish zarurligini aytdi.
Shavkat Mirziyoyev 1-aprel kuni Xitoy Kommunistik partiyasi Markaziy qo‘mitasi Xalqaro aloqalar bo‘limi mudiri Lyu Szyanchao boshchiligidagi delegatsiyani qabul qilgandi. Uchrashuvda oliy darajada erishilgan kelishuvlarga muvofiq O‘zbekiston bilan Xitoy o‘rtasidagi ko‘p qirrali hamkorlik va amaliy sheriklikni yanada kengaytirish masalalari ko‘rib chiqildi.
Xitoylik investorlar rejalashtirgan loyihalar
2024-yilning iyunida Xitoy kompaniyasi Farg‘onada yirik avtomobilsozlik majmuasini barpo etishi xabar berilgan edi. China Xiaou Group rahbari bilan o‘tkazilgan muzokaralarda ushbu loyihaning dastlabki bosqichida 50 million dollar investitsiya hisobiga yig‘ish, bo‘yash, sozlash liniyalarini yo‘lga qo‘yib, yiliga 60 mingta gaz, elektr va gibrid motorli avtomobillar hamda maxsus transport vositalari ishlab chiqarilishi belgilangandi.
Ikkinchi bosqichda 350 million dollar va uchinchi bosqichda 1,1 milliard dollar investitsiya yo‘naltirilib, butlovchi qismlarning ko‘pi mahalliylashtirilishi hamda ishlab chiqarilayotgan avtomobillarning soni 110 mingtaga yetkazilishi ko‘zda tutilgan. Loyiha 5 yil davomida to‘la yakunlanishi rejalashtirilgan.
Xitoyning mashinasozlik sohasida ilg‘or kompaniyalaridan biri bo‘lgan Zhejiang Yizhou Machinery Technology kompaniyasi viloyat hududida qurilish sanoati uchun uskunalar ishlab chiqarishni rejalashtirmoqda.
Baishan Zhongtian Development kompaniyasi tomonidan Farg‘ona shahrida besh yulduzli mehmonxona va savdo markazi majmuasini barpo etish ko‘zda tutilgan.
Bundan tashqari, China CAMC Engineering kompaniyasi O‘zbekistonda birinchi chiqindilarni yoqish zavodini qurmoqchi. Xitoyning JC Finance Interconnect Holdings kompaniyasi esa ta’lim va kasbga tayyorlash o‘quv markazini ochmoqchi.
Xitoylik investorlar Farg‘ona viloyatining Quvasoy sanoat zonasida 2025-yilning yakuniga qadar “Tulpor” savdo belgisi ostida traktorlar ishlab chiqarishni ham yo‘lga qo‘ymoqchi.
Izoh (0)