Xitoy kompaniyasi vakillari Andijonda qalampirni qayta ishlash loyihasini yo‘lga qo‘yishi mumkin. Bu haqda Andijon viloyati hokimligi matbuot xizmati xabar berdi.
Qayd etilishicha, Andijon viloyati hokimi Shuhrat Abdurahmonov Xitoydagi Xinjiang Tian jiao Hong an Agricultural Co Ltd. kompaniyasining Zhang Xing Gui boshchiligidagi vakillari bilan uchrashgan. Xitoylik ishbilarmonlar bilan Andijonda qalampirni qayta ishlash loyihasini tashkil etish bo‘yicha muhokamalar bo‘lib o‘tgan. Loyihaning umumiy qiymati 10 million dollarni tashkil etadi.
Mazkur loyihani amalga oshirishda mahalliy fermerlar bilan 2 ming gektar yer maydonida qalampir yetishtirish uchun to‘g‘ridan to‘g‘ri shartnomalar imzolanishi ilgari surilgan.
Xitoyliklar Andijon fermerlari tomonidan yetishtirilgan qalampirlarni 1,1 dollar narxda sotib olishga tayyor. Loyihani ishga tushirilishi yiliga qariyb 30 million dollarlik mahsulot eksport qilish imkonini yaratadi.
“Hamkorlik yuzasidan dastlabki bosqichdagi kelishuv harakatlari boshlandi”, — deyiladi xabarda.
Bundan oldin Xitoy kompaniyasi Andijonda quyosh fotoelektr stansiyasini, Janubiy Koreya esa O‘zbekistonda poligonlardan chiqayotgan gazlarni ushlab qoluvchi obyekt qurishi to‘g‘risida xabar berilgandi.
Izoh (0)