“Qizim” serialidagi roli bilan tomoshabinlarga yaxshi tanish bo‘lgan aktyor Talʼat Yo‘ldoshev YouTube’dagi “Daryo lifestayle” kanaliga bergan intervyusida otasiz ulg‘aygani sabab 9 yoshidan ishlashga majbur bo‘lgani va muhojirlikni boshdan kechirgani haqida gapirdi.
“9 yoshimda otamdan ayrilganman”
— Dadam rahmatli temiryo‘lda revizor bo‘lib ishlagan. Unga Toshkentga kelib ishlash taklifi ko‘p bo‘lgan ekan, ammo negadir rad etgan. U respublikaning barcha nuqtalariga tekshiruv bilan borar, halolligi uchun uni hurmat qilishar ekan. Afsuski, dadam 43 yoshida vafot etdi va onam uch bola bilan beva qoldi. Akam kasal edi, og‘ir ish qilsa yoki nimadandir asabiylashsa sudurgi tutib, tobi qochardi. Shu bois, onamga ko‘maklashish uchun 9 yoshimdan ishlashni boshlaganman. 8 yil davomida sartaroshlik qilganman. Orada ofitsiantlik, chiptachilik va poyabzal ustachiligini ham qilib, onamga yordamlashdim. 2008-yili do‘stim xonanda Hamdam Sobirov bilan Rossiyaga ishlagani borganmiz. U yerda ham qurilishda ishlab, bir tiyin pulsiz O‘zbekistonga qaytib kelganmiz, deydi Talʼat Yo‘ldoshev.
“Musofirchilikdagi qiyinchiliklarni eslash ham og‘ir”
— Onam borishimga qarshi bo‘lgan. Ammo oyoq tirab turib olganman. Hamdamning oilaviy sharoiti ham yomon edi, xullas, besh kishi Rossiya qaydasan deb yo‘lga tushganmiz. Menga sartarosh bo‘lishni aytishgandi. Ammo borgandan keyin bir oy ishsiz yurdik, keyin qurilishga olib borishdi. O‘sha yerda pasportlarimizni olib qo‘yib, bizni sotib yuborishganini bilganmiz. U yerdagi qiyinchiliklarni so‘z bilan tasvirlab bo‘lmaydi. Odamning zarracha qadri yo‘q edi. Uydagilar siqilmasin deb telefonda kulib gaplashardik, ammo holimiz juda xarob edi. Akamning boshida o‘simtasi borligi uchun havo almashtirar degan umidda uni ham olib ketgandim. Ammo og‘ir sharoit sabab, har kuni o‘zini yo‘qotib, xushdan ketadigan bo‘lib qoldi. Ish beruvchilarga akamni uyga jo‘natib yuboraylik, desam yo‘q deyishdi. Hatto, buning uchun 3 500 rubl berishimni so‘rashdi. Hech esimdan chiqmaydi o‘sha kuni bitta rusning uyiga borib, hojatxona uchun o‘ra qazigandim. Ammo juda qo‘rqqanman, chunki o‘sha paytlarda baʼzilar pul bermaslik uchun o‘ra qaziyotgan ishchining ustidan tuproq tashlab, o‘ldirishgani haqidagi gaplar qulog‘imga chalingandi. Kechgacha ishlab, yetarli pulni ish beruvchiga olib kelganman, shundan keyingina u bemor akamning uyga qaytishiga ruxsat bergan. Har kuni tekshiruv kelardi, ulgurgan berkinardi yoki urib-turtib mahkamaga ketardi. O‘shanda o‘z-o‘zimga qaytib Rossiyaga ishlash uchun kelmayman, deb vaʼda bergandim, deydi aktyor Talʼat Yo‘ldoshev.
“Oilaning yolg‘iz erkagiman...”
— Baʼzan katta-kichik davralarda o‘tirganimizda “Unchalik mashhur bo‘lib ketmadingiz, siz isteʼdodli aktyorsiz”, degan gaplarni aytib qolishadi. Odamlarga muammolaringizni bilmay turib, baho berish oson. 2008-yili institutga kirdim, olti oy o‘tar-o‘tmay akam vafot etdi. Undan keyin opamning turmush o‘rtog‘i olamdan o‘tdi. Opam 3 ta qizi bilan qaytib keldi. O‘sha paytda jiyanlarim 5-6 yoshdagi qizaloqlar edi. Ro‘zg‘or yukini yelkamga ilishga va besh ayol uchun masʼul bo‘lishga majbur bo‘ldim. Jiyanlarimni o‘qitib, ularning ikkitasini turmushga berdik. Tan olaman, ijodni emas, baʼzida pulni o‘ylashga majburman. Chunki uyimiz yo‘q, bir necha yildan buyon Toshkentda ijarada yashaymiz. Buning qanchalik qiyinligini ijarada yashaydiganlar yaxshi bilishadi, deydi Talʼat Yo‘ldoshev.
“Birovga ishonib uysiz qolganman”
— Uy quruvchi juda mashhur firma bilan reklama bo‘yicha ishlaganman. Falon summani bersangiz, uyli bo‘lishingizga yordam beraman deyishdi. Uyni tekinga berishmasdi, ularning piari bilan shug‘ullanishim va kelishuv asosida topgan pulimni beriladigan uyga yo‘naltirishlari kerak edi. Toshkentga kelib ishlari yurishib ketganidan keyin negadir fikrlari o‘zgardi. Men esa Navoiydagi uyni sotib bo‘lgandim, pulni biznesga tikdim, ammo orada avariyaga uchraganim uchun u ishim ham o‘xshamadi. Xullas, quruvchining vaʼdasiga ishonib oila aʼzolarimni uysiz qoldirdim. Bu men uchun og‘ir zarba bo‘ldi, deydi aktyor.
Suhbatni to‘liq holda tomosha qilishingizni tavsiya qilamiz.
Izoh (0)