BBC’ning 100 dan ortiq xodimi teleradiokompaniyaning bosh direktori Tim Deviga ochiq xat yozib, direktorlar kengashini G‘azodagi urushni yoritishda “Isroil tarafdori” bo‘lganlikda aybladi. Bu haqda Daily Sabah xabar berdi.
Xatga 300 dan ortiq ommaviy axborot vositalari mutaxassislari, jumladan, aktyorlar Miriam Margolyes, Charlz Dans va rejissyor Mayk Li tomonidan ham imzo chekilgan.
Unda BBC o‘z tahririyatining standartlariga javob bermaganlikda tanqid qilinib, G‘azodagi gumanitar inqirozni “yetarlicha yoritmayotgani” aytilgan. Norozichilarning ta’kidlashicha, kontentlar ko‘pincha “Isroil hukumati va harbiylari uchun piar” vazifasini bajarmoqda.
Shuningdek, ichki senzuraga ham to‘xtalib o‘tilgan. BBC xodimlari ijtimoiy tarmoqlarda “Isroilni tanqid qiluvchi maqolalarni tarqatgani” uchun ayblangan. Ba’zi kontent yaratuvchilari esa tahririyat bosimiga uchraganini aytmoqda. Maktubda BBC direktorlar kengashi a’zosi Robbi Gibbning yahudiylar bilan aloqalari tufayli iste’foga chiqishi talab qilingan. U Falastinga qarshi maqola nashr etishda ham ayblanmoqda.
Ta’kidlanishicha, BBC suratga olgan “G‘azo: shifokorlar hujum ostida” hujjatli film ham ancha ziddiyatlarga sabab bo‘lgan. Dastlab, film tahririyatning yuqori darajadagi xodimlari tomonidan ma’qullangan. Biroq film yakuniy tahririyat tekshiruvlaridan o‘ta olmagan. Bunga film mualliflaridan biri, jurnalist Ramita Navai Isroilni “firibgar davlat” deb atagani sabab bo‘lgani aytilmoqda. BBC direktorlar kengashi esa filmni to‘xtatish qaroriga ular ta’sir o‘tkazmaganini ta’kidlagan. Keyinchalik hujjatli filmni Channel 4 telekanali sotib olgan.
Izoh (0)