Toshkent shahrida elektr ta’minotida uzilishlar haqida ijtimoiy tarmoqlarda murojaatlar ko‘paydi. “Hududiy elektr tarmoqlari” bunga munosabat bildirdi.
Unda aytilishicha, ayni paytda “Hududiy elektr tarmoqlari” AJ tomonidan Toshkent shahri va viloyatlarda joriy yil kuz-qish mavsumiga tayyorgarlik ko‘rish hamda davlat dasturlari, sohaga oid qaror va farmonlar ijrosini ta’minlash maqsadida taqsimlash tarmoqlarida yangilash hamda ta’mirlash ishlari olib borilmoqda.
Mazkur jarayonda ishchi-xodimlarni xavfsizligi ta’minlash maqsadida hududlar kesimida rejaviy o‘chirishlar amalga oshirilmoqda. Bunday rejaviy o‘chirishlar Toshkent shahri va hududlarda jamiyatning korxona va filial axborot xizmatlari tomonidan doimiy ravishda e’lon qilinib borilishi ta’minlangan.
“Shu o‘rinda aytish lozimki, tarmoqlarni yangilash va mavsumga tayyorgarlik ishlari kechiktirib bo‘lmaydigan yumushlar sirasiga kirib, ayni paytda yozning issiq kunlariga qaramasdan ham olib borilmoqda”, deyiladi xabarda.
Shu bilan bir qatorda kunning issiq kunlarida ma’lum hududlarda avariyaviy holatlarning yuzaga kelishi ham elektr energiyasida uzilishlarni vujudga keltirib chiqarishiga sabab bo‘layotgani qayd etilgan.
“Bu holatlarda jamiyatning tuman, shahar elektr ta’minoti bo‘limlarining tezkor chiqish brigadalari tomonidan qisqa muddatlarda bartarf etilishi ta’minlanmoqda”, deyiladi xabarda.
“Hududiy elektr tarmoqlari” AJ iste’molchilarga yetkazilayotgan noqulaylik uchun uzr so‘ragan holda, rejaviy o‘chishlar haqida aholini xabardorligini yanada oshirish choralari ko‘rilishni ma’lum qildi.
O‘zbekistonda 2024-yilning yozida kuzatilgan anomal issiq ob-havo sharoitida elektr energiyasiga bo‘lgan talab hafta davomida 16,5 mln kVt/soat yoki o‘rtacha 7,1 foiz oshgandi. Xususan, 25- va 26-iyul kunlari energotizim bo‘yicha mutlaq tarixiy rekord ko‘rsatkichlar yangilangandi. Energetika vazirligi 2025-yil yozida sutkalik elektr energiyasi iste’moli statistikasini hozircha e’lon qilmadi.
Izoh (0)