Andijon viloyatining bir nechta hududlarida jami 1 mlrd so‘mdan ortiq elektrdan noqonuniy foydalanish holatlari aniqlandi.
Bosh prokuratura huzuridagi Departamentning xabariga ko‘ra, Andijon shahri va Xo‘jaobod tumanida YATT A.U. o‘zining savdo do‘konida hamda “M.P.” MCHJ masʼul shaxslari “Bahrin” MFY hududidagi umumiy ovqatlanish oshxonasida jami 531,6 mln so‘mlik elektrdan noqonuniy foydalanib kelgan.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
O‘zenergoinspeksiyaning xabar berishicha, Izboskan tumanida joylashgan Nasos stansiyalari energetika boshqarmasi iste’mol qilingan elektrni haqiqiy ko‘rsatgich bo‘yicha hisobot bermasdan, noqonuniy foydalanib kelgan.
Ushbu qoidabuzarlik natijasida elektr ta‘minoti korxonasiga 352,5 mln so‘mlik zarar yetkazilgan.
Shuningdek, Baliqchi tumani, “Sirmoq” MFYda joylashgan Nasos stansiyalari energetika boshqarmasida ham shunday holat aniqlandi. Unda elektr ta’minoti korxonasiga 121,4 mln so‘mlik zarar yetkazilgan.
Hozirda huquqni muhofaza qilish organlari tomonidan tergovga qadar tekshiruv ishlari olib borilmoqda.
Bunday holatlar soni ortib bormoqda
Samarqand viloyatidagi korxonalardan biri 553 million so‘mlik elektrdan noqonuniy foydalangani aniqlangandi. Shu bilan birga, Qashqadaryoda 177 mln so‘mlik gaz va “svet”dan noqonuniy foydalangan shaxslar ushlangani xabar qilingandi.
Shuningdek, Qashqadaryoda elektrdan noqonuniy foydalangan korxona davlatga 1 mlrd so‘mdan ziyod zarar yetkazgan. Bundan tashqari, Toshkent, Samarqand va Qashqadaryo viloyatlarida energiya resurslariga noqonuniy ulanish holatlari fosh etilgandi. Shuningdek:
- Buxoroda 1,2 mlrd so‘mlik elektrdan noqonuniy foydalanilgani aniqlandi.
- Qoraqalpog‘istonning uchta hududida 845 mln so‘mlik gazdan noqonuniy foydalanildi.
- Buxoro va Jizzaxda elektrdan noqonuniy foydalanganlar 360 mln so‘mdan ziyod zarar yetkazdi.
- Uchta viloyatda qariyb yarim mlrd so‘mlik gazdan noqonuniy foydalanildi.
2025-yil may oyida o‘tkazilgan tekshiruvlar natijasida iste’molchilar tomonidan energiya resurslaridan noqonuniy foydalanilgan 229 ta holat aniqlanib, tizimga 94 milliard 887 million so‘mlik zarar yetkazilgani ma’lum bo‘ldi.
Jumladan, noqonuniy foydalanishlar natijasida:
- 35,6 million kVt soat elektr energiyasi (taxminan 57,9 milliard so‘m) va
- 13,2 million metr kub tabiiy gaz (taxminan 36,9 milliard so‘m) talon-toroj qilingan.
Nazorat tadbirlari yakuniga ko‘ra, energiya resurslaridan foydalanish qoidalarini buzgan iste’molchilar bo‘yicha 448 ta ma’muriy ish rasmiylashtirildi. Belgilangan tartibda choralar ko‘rilib, tegishli hujjatlar huquqni muhofaza qiluvchi organlarga taqdim etildi.
Izoh (0)