Nepalning shimoliy qismida yuz bergan kuchli suv toshqini mamlakatni Xitoy bilan bog‘lovchi Miteri ko‘prigini vayron qildi. Bu haqda The Kathmandu Post gazetasi xabar bermoqda.
Mahalliy hokimiyat ma’lumotlariga ko‘ra, Rasugadxi chegara posti hududida yuz bergan fojia oqibatida 18 kishi bedarak yo‘qolgan. Ularning orasida uch nafar politsiyachi, to‘qqiz nafar mahalliy aholi va olti nafar Xitoy fuqarosi bor.
Ma’lum qilinishicha, daryoning yuqori oqimida — Xitoy tomonida yog‘gan kuchli yomg‘ir daryoning toshishiga olib kelgan, bu esa Rasuva bojxonasi hovlisiga zarar yetkazgan. To‘qqizta yuk ortilgan konteyner suv toshqini oqibatida oqib ketgan.
Rasmiylarning aytishicha, bojxona hududida qolib ketgan ba’zi odamlar qutqarilgan, biroq har tomondan kuchli suv toshqini davom etayotgani sababli qutqaruv ishlari yanada qiyinlashmoqda.
Suv toshqini Timure tumanidagi elektromobillar uchun zaryadlash stansiyasi va “Rasugadxi” gidroelektr stansiyasi to‘g‘oniga ham zarar yetgan. Voqea joyiga olib boruvchi Pasang-Lxamu shohko‘chasining bir qismi ham shikastlangan, bu esa qutqaruv texnikasini yetkazishni qiyinlashtirmoqda.
Rasmiylar suv sathi ko‘tarilishda davom etayotgani bois aholidan hushyorlikni saqlab turishni so‘ramoqda.
Bundan avval Nepalda so‘nggi bir oy ichida musson yomg‘irlari bilan bog‘liq hodisalarda 30 dan ortiq odam hayotdan ko‘z yumdi, 150 kishi jarohatlangani ma’lum qilingandi.
AQSHning Texas shtatida 4-iyul kuni boshlangan suv toshqinlari oqibatida halok bo‘lganlarning soni 100 nafardan oshgani xabar qilingandi.
Izoh (0)