Nepalda kommunistik partiya rahbari mamlakatning yangi bosh vaziriga aylandi. Bu haqda Al Jazeera nashri xabar berdi.
Manbada aytilishicha, so‘nggi saylov jarayonlaridan so‘ng Xadga Prasad Sharma Oli bosh vazirlikka tayinlangan. U mamlakatdagi ikki yirik partiya koalitsiya tuzishi ortidan hokimiyatga kelgan.
Nepal prezidenti devoni 14-iyul kuni maxsus bayonot eʼlon qilgan. Unda aytilishicha 72 yoshli Sharma Oli to‘rtinchi muddatga lavozimiga tayinlangan.
Mamlakatni 18 oy davomida boshqarib kelgan sobiq rahbar Pushpa Kamal Dahal saylovlarda muvaffaqiyatsizlikka uchragan. Hukumatda deputatlar ishonchsizligi kuchayishi sobiq yetakchining faoliyatiga yakun yasagan.
Hukumatni egallash uchun yetarli ovozga ega bo‘lmagan Olining Kommunistik partiyasi va markazchi Kongress partiyalari koalitsiya shakllantirgan. Endilikda hukumat kelishuv asosida boshqarilishi xabar qilingan.
Hokimiyatni taqsimlash bo‘yicha yangi kelishuvga ko‘ra, Oli va Nepal Kongressi partiyasining prezidenti, 78 yoshli Sher Bahodur Deuba 2027-yilgi umumiy saylovga qadar bosh vazir lavozimini birga egallab turishadi.
Oli siyosatga o‘smirlik chog‘ida kirib kelgan. Monarxiyani ag‘darish kampaniyasida qatnashgani uchun 14 yil qamoqda o‘tirgan. 1987-yilda ozodlikka chiqqanidan keyin kommunistik partiya safiga qo‘shilgan.
Sharma Oli birinchi marta 2015-yilda bosh vazir etib saylangan. 2018- va 2021-yillarda u yana ikki bor bosh vazir bo‘lgan.
Mamlakat aholisi yangi hukumatdan keng islohotlar kutayotgani maʼlum qilingan. Chunki, mamlakatda turmush darajasi nihoyatda past. 30 millionga yaqin aholisi bo‘lgan Himolay mamlakati koronavirus pandemiyasining turizm sanoatiga yetkazgan zararini hali ham qoplay olgani yo‘q. Mamlakatda o‘tkir iqtisodiy muammolar yetilib qolgan.
Nepalning avvalgi hukumatlari Hindiston bilan mustahkam aloqalarga ega bo‘lgan. Kommunistik partiyaning hukumatga kelishi esa mamlakatni Pekin bilan bog‘lashi taxmin qilingan.
Izoh (0)