Pora olayotganida ushlangan Kogon tumani prokurori Bahodir G‘ulomov 15 yilga ozodlikdan mahrum etildi.
Jinoyat ishlari bo‘yicha Samarqand shahar sudida 2-avgust kuni unga tegishli jinoyat ishi ko‘rib chiqilgan. “Daryo” tanishib chiqqan sud hujjatiga ko‘ra, Bahodir G‘ulomov Kogon tumani prokurori lavozimida ishlab kelib firibgarlik yo‘li bilan o‘zganing juda ko‘p miqdordagi pul mablag‘larini qo‘lga kiritish maqsadida 2024-yil yanvar oyi boshlarida N.No‘monov va xavfli retsidivist bo‘lgan Z.Adilov bilan jinoiy til biriktirgan.
Ular Buxoro viloyat prokuraturasi o‘ta og‘ir jinoyatlarni tergov qilish bo‘limi tomonidan tergov harakatlari olib borilayotgan “Kogon yog‘-ekstraksiya zavodi” AJ mansabdor shaxslariga nisbatan jinoyat ishi bo‘yicha jamiyat ta’sischilaridan birining ishonchiga kirib, jinoyat ishi doirasida unga nisbatan ayblov e’lon qilmaslik va jinoiy javobgarlik masalasini Buxoro viloyat prokuraturasida ishlovchi mansabdor shaxslar orqali hal etishi mumkinligini aytib, 100 ming dollar miqdorida pora berishga dalolat qilgan.
Bahodir G‘ulomov 15-yanvar kuni Buxoro shahridagi “Turon” mehmonxonasi oldida 100 ming dollarni jinoiy sherigi N.No‘monov orqali olgan. Shuningdek, u jinoiy harakatlarini davom ettirib, “Kogon yog‘-ekstraksiya zavodi” AJga aloqador shaxslarni Buxoro viloyat prokuraturasida ishlovchi mansabdor shaxslar orqali tergovga jalb qilmaslik va jinoiy javobgarlikka tortmaslik evaziga yana 100 ming dollar pora berishga dalolat qilgan hamda firibgarlik yo‘li bilan 44 ming dollarni qo‘lga kiritgan.
Shundan 10 ming dollarni Z.Adilov olib, qolgan 34 ming dollarni N.No‘monov kelgusida Bahodir G‘ulomovga berish uchun o‘zida saqlab kelgan. 13-fevral kuni Buxoro shahar markaziy kasalxonasi yonida o‘tkazilgan tezkor tadbirda Bahodir G‘ulomov N.No‘monov orqali 56 ming dollarni olgan vaqtida daliliy ashyolar bilan ushlangan.
Sud hukmi bilan Bahodir G‘ulomov Jinoyat kodeksining 168-moddasi 4-qismi “a” bandi (juda ko‘p miqdorda firibgarlik), 28, 211-moddasi 3-qismi “a” bandida (juda ko‘p miqdorda pora berishda ishtirokchilik) nazarda tutilgan jinoyatlarni sodir etganlikda aybli deb topilgan.
Unga 3 yil muddatga prokuratura organlari tizimida ishlash huquqidan mahrum qilgan holda 15 yilga ozodlikdan mahrum qilish jazosi tayinlangan. Shuningdek, uning sheriklari — N.No‘monov 11 yil, xavfli retsidivist hisoblangan Z.Adilovga 12 yilga ozodlikdan mahrum qilish jazosi berilgan.
Prezident fevral oyida Andijonda bo‘lib o‘tgan yig‘ilishda “sekin-sekin 200 ming dollarni gaplashgan” Kogon tumani prokurori qilmishini tanqid qilib, uni noinsof deb aytgandi.
Avvalroq Asaka tuman prokurori o‘rinbosari 8 yil 6 oy muddatga ozodlikdan mahrum qilingani haqida xabar berilgan edi.
Pora bilan qo‘lga tushgan prokuratura xodimlari
Aprel oyida Qarshi tumani prokuraturasi tergovchisi ish yurituvidagi jinoyat ishi bo‘yicha aybdor shaxsga nisbatan yengillik qilib berish evaziga 5 ming dollar pora bilan ushlangandi. Iyun oyida esa Surxondaryo viloyati prokuraturasi bo‘lim katta prokurori 10 ming dollar pora olayotganida qo‘lga tushdi.
Izoh (0)