AQSH prezidenti Donald Tramp 1-iyul kuni Isroil G‘azoda o‘t ochishni to‘xtatishning “zarur shartlariga rozi bo‘lganini” ma’lum qildi. Bu haqda CNN xabar berdi.
HAMASning esa shartlarni qabul qilishi noma’lumligicha qolmoqda. AQSH va Isroil ma’muriyatiga ko‘ra, HAMAS kelishuvga baribir rozi bo‘ladi. Tramp Truth Social’dagi postida guruhning roziligini olishga Qatar va Misr yordam berishini aytgan.
“Mening vakillarim bugun G‘azoda isroilliklar bilan uzoq va samarali uchrashuv o‘tkazdi. Isroil 60 kunlik o‘t ochishni to‘xtatishning zarur shartlarga rozi bo‘ldi. Bu vaqt ichida biz urushni tugatish uchun barcha tomonlar bilan ishlaymiz. Tinchlik o‘rnatilishiga ko‘maklashayotgan Qatar va Misr yakuniy kelishuvni yetkazib beradi. Umid qilamanki, Yaqin Sharq manfaati uchun HAMAS bu kelishuvni qabul qiladi. Chunki holat yaxshilanmaydi — faqat yomonlashadi”, degan Tramp o‘z postida.
Qatar rasmiylari 1-iyul kuni HAMASga ham, Isroilga ham Tramp tomonidan qo‘llab-quvvatlanayotgan 60 kunlik o‘t ochishni to‘xtatish taklifini taqdim etgan. Ushbu taklif prezident Donald Trampning maxsus vakili Stiv Uitkoff boshchiligidagi bir necha oylik yashirin sa’y-harakatlardan so‘ng ishlab chiqilgan. Taklif etilayotgan kelishuvda HAMASning ham manfaatlari hisobga olingan. Unga ko‘ra, isroillik garovga olinganlar falastinlik mahbuslar evaziga ozod qilinadi.
Tramp 30-iyun kuni Isroil bosh vaziri Binyamin Netanyaxu bilan uchrashishi rejalashtirilgandi. Unda o‘t ochishni to‘xtatish yoki G‘azoga hujumlarni kuchaytirish masalasi ko‘rib chiqilishi kerak edi. Yahudiy davlati vakili 1-iyul kuni Isroil urushda barcha maqsadlariga to‘liq erishmaganini va HAMAS kuchlari qisqarib, yashirinib olgani sababli ularni nishonga olish qiyinlashganini bildirgan.
Izoh (0)