Isroil G‘azo bo‘yicha “B reja”ni AQSHga topshirdi

Isroil AQSHga G‘azo sektorida HAMAS siyosiy byurosi rahbari Yahyo Sinvar va uning yordamchilarining anklavdan xavfsiz chiqib ketishini kafolatlaydigan yangi sulh takliflarini taqdim etdi. Bu haqda The Times of Israel xabar bermoqda.

Mazkur rejaga ko‘ra, Isroil HAMAS tomonidan garovga olingan barcha asirlar ozod qilinishini, shuningdek, Isroildagi falastinlik mahbuslarni qo‘yib yuborishni taklif qilayotgani ma’lum etildi.

Bundan tashqari, loyiha G‘azo sektorida harbiy harakatlarni to‘xtatish va anklavni demilitarizatsiya qilish, shuningdek, sektorda yangi boshqaruv tizimini yaratishni nazarda tutadi. Biroq bu tashabbuslar tafsilotlari haqida xabar berilmagan.

Isroilning o‘g‘irlangan va bedarak yo‘qolgan fuqarolar bo‘yicha komissari Gal Xirsh garovga olinganlarning yaqinlariga bu taklif o‘tgan hafta Oq uy va davlat departamenti rasmiylariga yetkazilganini aytdi. Shu bilan birga, ushbu loyiha “B rejasi” deb nomlangan.