Bali qirg‘oqlari yaqinida 65 kishi bo‘lgan parom cho‘kib ketdi

Bali qirg‘oqlari yaqinida 2-iyul kuni bortida 65 kishi bo‘lgan KMP Tunu Pratama Jaya nomli parom cho‘kib ketdi. Bu haqda CNN Indonesia xabar berdi.

Parom Ketapang—Banyuvangi—Gilimanuk yo‘nalishida harakatlanayotgan bo‘lgan. U suzib chiqqanidan taxminan 25 daqiqa o‘tib cho‘kib ketgan. Dastlabki ma’lumotlarga ko‘ra, bortda 53 nafar yo‘lovchi va 12 nafar ekipaj a’zosi bo‘lgan.

Bundan tashqari, parom 22 ta avtomobil, jumladan, 14 ta yuk mashinasini ham tashiyotgan edi. Voqea joyiga yuborilgan qutqaruvchilar hozirgacha 23 nafar yo‘lovchini tirik holda topishga muvaffaq bo‘lgan. Ular avariya paytida paromdan qutqaruv qayig‘i yordamida evakuatsiya qilingan.

23 kishi qutqarildi, to‘rt kishi halok bo‘ldi, degan Yava orolidagi Banyuvanga shahri politsiyasi boshlig‘i Ram Samtama Putra.

Paromning cho‘kish sabablari aniqlashtirilmoqda. Indoneziya rasmiylari hodisa bo‘yicha tergov boshlagan. Mamlakatda orollar o‘rtasidagi parom qatnovi juda keng tarqalgan bo‘lib, bu transport turi har yili millionlab odamlar tomonidan ishlatiladi.

Biroq yillar davomida xavfsizlik choralarining yetarli emasligi bois bunday halokatlar bir necha marta sodir bo‘lgan. Mutasaddilar bedarak yo‘qolganlarni qidirish ishlarini davom ettirmoqda. Qutqaruvchilarga dengiz floti, politsiya, va mahalliy ko‘ngillilar yordam bermoqda.