AQSHning Texas shtatida 4-iyul kuni boshlangan suv toshqinlari oqibatida halok bo‘lganlarning soni 100 nafardan oshdi. Bu haqda BBC xabar berdi.
Qidiruv-qutqaruv guruhlari daryo qirg‘oqlarida jabrlanganlarni izlashda davom etmoqda. Hududda yana yomg‘ir yog‘ishi va momaqaldiroq kuzatilishi prognoz qilingan.
Camp Mystic xristian yozgi lageri suv ostida qolishi oqibatida 27 nafar qiz va xodimlar halok bo‘lgan. Yana 10 nafar qiz va lager maslahatchisi bedarak yo‘qolgan.
Qurbonlarning kamida 84 nafari — 56 nafar kattalar va 28 nafar bolalar — Kerr okrugida halok bo‘lgan. Hududdagi Guadalupe daryosining suv sathi 4-iyuldan beri kuchli yog‘ingarchilik tufayli ko‘tarilib ketgan. 32 nafar yo‘qolganlarning shaxsiga hali ham aniqlik kiritilmagan.
Tramp ma’muriyatining tanqidchilari falokatni Milliy ob-havo xizmati bosh agentligi — Milliy okean va atmosfera ma’muriyatidagi minglab ish o‘rinlarining qisqarishi bilan bog‘lagan. Oq uy esa bu qisqartirish tabiiy ofat bilan kurashishda to‘sqinlik qilmasligini aytgan.
Oq uy matbuot kotibi Karolin Livitt ayblovlarga shunday javob berdi: “Bu Xudoning ishi. Toshqin ma’lum vaqtda sodir bo‘lgani uchun ma’muriyatning aybi yo‘q. Lekin aholi oldindan ogohlantirilgan”.
Uning ta’kidlashicha, ob-havo idorasi toshqin arafasida mahalliy amaldorlar uchun brifinglar o‘tkazgan. Shu hafta oxirida mamlakat prezidenti Donald Tramp Texasga tashrif buyurishi kutilmoqda. Undan federal hukumatning qisqartirishlari tabiiy ofatga qarshi kurashga to‘sqinlik qilgan-qilmagani haqida so‘ralgan. U bunga javoban Bayden davri hukumatini aybdor qilib ko‘rsatgan.
Izoh (0)