Avstraliyada kuchli yomg‘ir yog‘ishi ortidan yirik suv toshqinlari yuzaga keldi. Mamlakatda ob-havoning keskinlashuvi haqida ogohlantirilgan, deb yozadi Reuters.
Avstraliya shimolidagi chekka hududda avtomobilini yo‘lda sel yuvib ketgach, olti soatdan ko‘proq vaqt davomida daraxtga yopishib turgan erkak politsiya tomonidan qutqarildi.
Qayd etilishicha, erkak avvaliga mashinasi ichida qamalib qolgan. So‘ng undan chiqishga muvaffaq bo‘lgan va yordam kutayotib, daraxtni mahkam ushlab olgan.
Qutqaruvchilarga erkakni xavfsiz joyga olib o‘tish uchun olti soatdan ko‘proq vaqt kerak bo‘ldi. Suv sathi pasaya boshlaganda u arqon bilan qutqarib olindi. Erkak jabrlanmagan.
Mahalliy ommaviy axborot vositalarining xabar berishicha, Kvinslend janubi va Yangi Janubiy Uelsning shimoli-sharqida keskin ob-havo, dahshatli shamol va kuchli yomg‘ir haqidagi ogohlantirishlar o‘z kuchida qolmoqda.
Avvalroq Xitoy shimolidagi Shansi provinsiyasida bir hafta tinmagan kuchli yomg‘ir keng ko‘lamli suv toshqinlarini keltirib chiqargandi. Oqibatda mintaqadagi 1 million 760 ming kishini evakuatsiya qilishga to‘g‘ri kelgan.
Shuningdek, Londonda kuchli yomg‘ir yog‘ib, oqibatda suv toshqini yuz bergani va bir nechta metro liniyalari yopilgani haqida xabar berilgandi.
Eslatib o‘tamiz, iqlimni o‘rganuvchi Climate Central tashkiloti 2030-yilga kelib suv ostida qolishi mumkin bo‘lgan shaharlar ro‘yxatini e’lon qildi.
Izoh (0)