“AQSH Isroil va Eron o‘rtasidagi urushda tutib oluvchi raketalarining chorak qismini sarfladi” — CNN

Amerika Qo‘shma Shtatlari iyun oyida Isroil va Eron o‘rtasidagi 12 kunlik mojaro paytida THAAD (Terminal High Altitude Area Defense) tutib oluvchilar arsenalining taxminan 25 foizini sarfladi. Bu haqda CNN xabar bermoqda.

“Amerika qo‘shinlari Tehronning yirik ballistik zarbasini qaytarish uchun 100 dan 150 tagacha to‘xtatuvchilarni yubordi. AQSH ixtiyorida jami yettita THAAD batareyasi bor bo‘lib, ulardan ikkitasi Isroil hududida joylashtirilgan”, dedi telekanal manbasi.

Komplekslarning qisqa vaqt ichida bunday intensiv qo‘llanilishi, ekspertlarning fikriga ko‘ra, AQShning strategik zaxiralarini ta’minlash va tiklashda muammolarni keltirib chiqardi.

2023-yilda AQSH bor-yo‘g‘i 11 ta THAAD ushlagichini ishlab chiqargan bo‘lsa, joriy moliyaviy yilda yana 12 ta ushlagich yetkazib berilishi kutilmoqda.

THAAD — Yer atmosferasida ham, undan tashqarida ham polttning yakuniy qismida qisqa, o‘rta va oraliq masofali ballistik raketalarni urish va yo‘q qilishga qodir mobil tizim. Har bir batareyaga 95 nafar amerikalik harbiy xizmatchi xizmat ko‘rsatadi. Har bir batareya 6 ta uchirish moslamasi va 48 ta tutuvchi raketa bilan jihozlangan.

Isroil 13-iyun kechasi Eronga zarbalar berishni boshladi. Ularning maqsadi Tehronning yadro va raketa dasturlari bilan bog‘liq obyektlar edi. Bir sutkadan kamroq vaqt o‘tib, Eron javob hujumini amalga oshirdi. 22-iyun kechasi AQSH Qurolli kuchlari Eronning uchta yadroviy obyektiga hujum qildi, 23-iyun kechqurun esa Tehron Qatardagi Yaqin Sharqning eng yirik Al-Udeyd Amerika havo bazasiga raketa zarbalari berdi. Keyinroq AQSH Prezidenti Donald Tramp Isroil va Eron o‘t ochishni to‘xtatish rejimiga kelishib olganini ma’lum qildi. Bu kelishuv 24-iyundan kuchga kirdi.