Ijtimoiy tarmoqlarda fuqaroning IIO xodimlariga qarshilik ko‘rsatayotgani aks etgan videolar tarqaldi. Holat yuzasidan Toshkent shahar IIBB matbuot xizmati izoh berdi.
Maʼlum qilinishicha, Mirobod tumani hududida 11-mart kuni taxminan soat 21:30 larda 1989-yilda tug‘ilgan (muqaddam bir necha marotaba ma’muriy javobgarlikka tortilgan) X.A. o‘zining uch nafar voyaga yetmagan farzandlaridan (2015 y.t., 2020 y.t., 2022 y.t.) foydalanib, ularning sog‘lom hayot kechirishi, ta’limga jalb qilinishini ta’minlamasdan, tilanchilik bilan shug‘ullangan.
Mazkur huquqbuzarlikni to‘xtatish va qonuniy chora ko‘rish maqsadida PPX xodimlari ushbu ayolni yaqin oradagi IIBga taklif qilgan. Biroq, fuqaro ichki ishlar organlari xodimlarining qonuniy talablarini bajarmasdan jamoat tartibini buzgan.
Mazkur holat yuzasidan Mirobod tumani IIO FMB tomonidan fuqaro X.A.ga nisbatan Ma’muriy javobgarlik to‘g‘risidagi kodeksining 183-moddasi (mayda bezorilik), 188 prim 3-moddasi (tilanchilik qilish) va 194-moddasi (ichki ishlar organlari xodimining qonuniy talablarini bajarmaslik) bilan ma’muriy bayonnoma rasmiylashtirilgan.
Uch nafar voyaga yetmagan bolalarning huquqlarini himoya qilish va ijtimoiy yordam ko‘rsatish maqsadida Toshkent shahar IIBB Voyaga yetmaganlarga ijtimoiy-huquqiy yordam ko‘rsatish markaziga joylashtirish choralari ko‘rilmoqda.
Videotasvirda aks etgan holatda xodimlarning harakatiga baho berish maqsadida xizmat tekshiruvi tayinlangan.
Izoh (0)