Italiyaning Milan shahridagi Bergamo aeroportida samolyot dvigateliga kirib ketgan erkak vafot etdi. Bu haqda CNN xabar berdi.
Uchoq 8-iyul kuni Ispaniyaning Asturiya shahriga uchishga tayyorgarlik ko‘rayotgan bo‘lgan. Samolyot uchish-qo‘nish yo‘lagiga chiqqan paytda noma’lum shaxs yugurib kelib, harakatdagi dvigatelga yaqinlashgan va uning ichiga tortilib ketgan. Fojia samolyot hali havoga ko‘tarilmasidan avval ro‘y bergan.
Voqea yuz bergan paytda bortda 154 nafar yo‘lovchi va olti nafar ekipaj bo‘lgan. Ularga psixologik yordam ko‘rsatilmoqda. Marhum aeroport hududiga qanday kirgani va xavfsizlik choralari qanday buzilgani yuzasidan tergov ishlari boshlangan. Hodisa ortidan aeroportdagi reyslar vaqtincha kechiktirilgan. Hozirda marhumning shaxsini aniqlash ishlari olib borilmoqda.
Bergamo — Italiyadagi uchinchi eng gavjum xalqaro aeroport hisoblanadi. Aeroport yagona terminalga ega bo‘lib, 24 soat uzluksiz xizmat ko‘rsatadi. 2024-yilda u taxminan 17,4 million yo‘lovchiga xizmat ko‘rsatgan.
Izoh (0)