Hindistonda 270 kishining o‘limiga sabab bo‘lgan aviahalokatda ishtirok etgan samolyotning ikkala “qora qutisi” ham topildi. Bu haqda mamlakat bosh vaziri maslahatchisi Mishraga tayanib, The Economic Times xabar berdi.
Air India kompaniyasiga tegishli AI-171 reysi 13-iyun kuni havoga ko‘tarilganidan ko‘p o‘tmay Londonga uchayotgan vaqtda turar joy hududiga qulab tushgan edi. Birinchi “qora quti” shu kuni samolyot halokatga uchragan binoning tom qismidan topilgan.
Voqea joyiga Hindistonning aviahalokatlarni tekshirish byurosi bilan birga bir nechta xalqaro ekspert guruhlari yetib kelgan. Ular halokat sabablarini aniqlashda mahalliy tergovchilarga ko‘maklashmoqda.
Ikkinchi “qora quti” 15-iyun kuni aniqlangan. U tergovchilarga halokatdan oldingi voqealarni soniyaga-soniya tahlil qilish imkonini beradi. Bu, ayniqsa, uchuvchilar kabinasida nimalar sodir bo‘lganini aniqlashda muhim ahamiyatga ega.
Qora qutilar uchuvchilarning o‘zaro suhbatlarini, radio orqali aloqani, ogohlantiruvchi signallar va bortdagi mexanik tovushlarni yozib olgan. Bu ma’lumotlar halokatdan oldingi so‘nggi daqiqalarni yoritishda muhim rol o‘ynashi mumkin.
So‘nggi ma’lumotlarga ko‘ra, aviahalokat oqibatida halok bo‘lganlar soni 270 nafarga yetgan. Rasmiylar qurbonlarning shaxsini tasdiqlash uchun DNK tahlillarini o‘tkazmoqda. Hindiston va Buyuk Britaniyada fojiada vafot etganlarni xotirlash marosimlari bo‘lib o‘tgan.
Qora quti ma’lumotlari 2015-yildagi Germanwings halokatidan tortib, Malayziya havo yo‘llari bilan bog‘liq voqealargacha bo‘lgan global miqyosdagi yirik aviahalokatlarni tergov qilishda hal qiluvchi rol o‘ynagan.
Izoh (0)