Fuqaro O.N.ning murojaatiga asosan Toshkent viloyatida tezkor tadbir o‘tkazildi. Bu haqda Bosh prokuratura xabar berdi.
Maʼlum qilinishicha, fuqarolar Sh.A. va A.S.lar oldindan til biriktirib, murojaatchiga Toshkent viloyati, Bo‘ka tumanida joylashgan “O.R.” MCHJga tegishli 4 gektar noturar yerni 300 ming dollarga sotishni aytgan.
Shuningdek, yana 120 ming dollar evaziga yuqori lavozimda ishlovchi tanishlari orqali ushbu obyekt turini turarga o‘tkazib, kelgusida uy-joy qurish uchun ruxsatnoma olib berish va qurilishni boshlash uchun barcha hujjatlarni rasmiylashtirib berishga vaʼda qilgan.
Mazkur shaxslar oldindan 90 ming dollar olgan vaqtida ushlangan.
Mazkur holat yuzasidan Jinoyat kodeksining 168-moddasi 4-qismi “a” bandi (firibgarlik juda ko‘p miqdorda) va 28,211-moddasi 3-qismi “a” bandi bilan jinoyat ishi qo‘zg‘atilib, tergov harakatlari olib borishga kirishilgan.
Yerni noqonuniy sotishga urinish bo‘yicha boshqa holatlar
Farg‘onada fuqaro 2,5 gektar yerni 650 ming dollarga sotishga kelishib, oldindan 100 ming dollarni olgan vaqtida ashyoviy dalillar bilan ushlangandi. Toshkent viloyati Ohangaron tumanida joylashgan va qishloq xo‘jaligiga mo‘ljallangan 32 gektar yerni 2,4 mln dollarga noqonuniy sotmoqchi bo‘lgan shaxs qo‘lga olingandi.
Surxondaryo viloyatida fuqaro qishloq xo‘jaligiga mo‘ljallangan 45 sotix yerni 60 ming dollarga sotishga kelishib, 56,7 ming dollar va 43 million so‘m olgan vaqtida qo‘lga tushgandi. Xorazm viloyatining Urganch tumanida fuqaro davlat zaxirasida bo‘lgan 24 sotix yer maydonini kadastr tizimida ishlovchi tanishlari orqali xaridor nomiga rasmiylashtirib berish evaziga 45 ming dollar va 13 million so‘m olgan vaqtida ushlangandi.
Izoh (0)