Olimlar 86 million yil avval yashagan Khankhuuluu mongoliensis nomli tirannozavrning ilgari noma’lum turini aniqladi. ABC telekanali e’lon qilingan tadqiqot va olimlar bilan suhbatga asoslanib xabar berishicha, bu yangi tur T-Rex kabi ulkan tirannozavrlarning bevosita ajdodi bo‘lishi mumkinligi bilan alohida qiziqish uyg‘otmoqda.
Telekanal ma’lumotiga ko‘ra, qoldiqlar dastlab 1970-yillarda Mo‘g‘ulistonning Gobi cho‘lidan topilgan va go‘shtxo‘r alektozavrga tegishli deb hisoblangan. O‘shandan beri bu qazilmalar chuqur o‘rganilmagan edi. Biroq 2023-yilda Kanadaning Kalgari universiteti aspiranti ekspeditsiya paytida bu topilmalarga e’tibor qaratgan va ba’zi g‘ayrioddiy xususiyatlarni, jumladan, odatda bunday turlarda uchramaydigan burun atrofidagi havo bo‘shlig‘ini payqab, qayta o‘rganishni boshlagan.
“Qayta tekshiruvdan so‘ng tadqiqotchilar qazilmalar tirannozavridlarning yangi turiga tegishli ekan, degan xulosaga kelishdi”, deyiladi telekanal xabarida.
86 million yil avval yashagan bu yangi tur Khankhuuluu mongoliensis deb nomlandi.
Science Alert saytining ta’kidlashicha, u “nisbatan kichik” tirannozavr bo‘lib, o‘lchamlari “katta ot” bilan taqqoslanadi: bo‘yi taxminan ikki metr, vazni esa 750 kilogramm atrofida. Uning uzun oyoqlari tez yugurish imkonini bergan, ammo bosh suyagining tuzilishi xavfli yirtqich bo‘lishiga yo‘l qo‘ymagan. Taxminlarga ko‘ra, u 20 million yil keyinroq yashagan T-Rex kabi yirikroq tirannozavrlarning bevosita ajdodi bo‘lgan.
Bu kashfiyot tirannozavrlar evolyutsiyasining ilgari noma’lum bo‘lgan davrini yoritib berdi.
Yangi Zelandiya olimlari 2200-yilga kelib yer yuzidagi sudralib yuruvchilar gigant hajmga yetishini aniqlashdi. Taxmin qilinishicha, ayrim turdagi reptiliyalarning vazni 100 kilogrammdan oshishi mumkin. Hattoki eng mayda sudraluvchilar, masalan, iguanalar ham yirik itlar hajmiga yetishi mumkin.
Izoh (0)