Rossiyada erkak tishini oldirganidan so‘ng vafot etgani yuzasidan jinoiy ish qo‘zg‘atildi. Bu haqda Tergov qo‘mitasining mintaqaviy tergov boshqarmasi xabar berdi.
Ma’lum qilinishicha, Perm shahrida yashovchi 35 yoshli Yevgeniy Kunavin kuchli tish og‘rig‘i bilan stomatologga murojaat qilgan. Shifokor aql tishini olib tashlagan, ammo operatsiyadan keyin bemorda asoratlar boshlangan. Jumladan, infeksiya sepsisga aylanib ketgan.
Erkak bir yarim hafta davomida reanimatsiyada o‘pkani sun’iy shamollatish apparatida bo‘lgan. Ijtimoiy tarmoqlarda uning uchun donorlik qoni yig‘ish tashkil etilgan. Yevgeniy koma holatiga tushib, bir necha kundan so‘ng vafot etgan. Marhumning xotini va ikki farzandi qolgan.
Hodisa yuzasidan Rossiya Jinoyat kodeksining 109-moddasi 2-qismi (shaxsning o‘z kasbiy majburiyatlarini lozim darajada bajarmasligi oqibatida ehtiyotsizlik bilan o‘limga sabab bo‘lish) bo‘yicha jinoiy ish qo‘zg‘atilgan. Hozirda hodisaning barcha tafsilotlarini aniqlash bo‘yicha tergov harakatlari olib borilmoqda.
Izoh (0)