So‘qoq somsa geografik ko‘rsatkich sifatida davlat ro‘yxatidan o‘tkazildi. Bu haqda Adliya vazirligi xabar berdi.
Qayd etilishicha, Toshkent viloyati Parkent tumaniga qarashli So‘qoq qishlog‘iga xos bo‘lgan milliy taom — So‘qoq somsa Adliya vazirligi tomonidan geografik ko‘rsatkich sifatida davlat ro‘yxatidan o‘tkazildi.
Mazkur mahsulot o‘zining o‘ziga xos tabiiy masalliqlari, xususan, faqat So‘qoq tog‘larida o‘sadigan xalq orasida “mador” nomi bilan tanilgan o‘simlik yoki ismaloqdan tayyorlanishi, shuningdek, betakror ta’mi va xamirining o‘ziga xos usulda tayyorlanishi bilan ajralib turadi.
Geografik ko‘rsatkich sifatida ro‘yxatdan o‘tkazilishi So‘qoq somsaning aynan So‘qoq hududiga mansubligini belgilab, uning sifati, tarixiy ildizlari va madaniy qiymatini huquqiy jihatdan muhofaza qiladi.
Ushbu ro‘yxatga olish jarayoni Toshkent viloyati adliya boshqarmasining ko‘magida amalga oshirildi.
Geografik ko‘rsatkich — bu mahsulotning ma’lum hududga xosligi va uning sifati, mashhurligi yoki boshqa belgilari o‘sha hududning tabiiy, insoniy va tarixiy omillariga chambarchas bog‘liq bo‘lganligini ifodalovchi intellektual mulk obyekti hisoblanadi.
2024-yil yanvarida G‘uzor tandir go‘shti geografik ko‘rsatkich sifatida davlat ro‘yxatidan o‘tkazilgandi. Bundan tashqari G‘ijduvon shashlik, Zomin tandir go‘shti, Marg‘ilon adrasi va Qo‘qon pichoqlari ham patentlangandi.
2025-yil 5-fevral kuni esa Samarqand noni geografik ko‘rsatkich sifatida ro‘yxatga olindi. Iyun oyida esa tuxumbarak geografik ko‘rsatkich sifatida patentlandi. Shuningdek, Andijon do‘ppisi ham patentlandi.
Izoh (0)