Qashqadaryo viloyat adliya boshqarmasining ko‘magi bilan 8-yanvar kuni “G‘uzor tandir go‘shti” geografik ko‘rsatkich sifatida Adliya vazirligi tomonidan davlat ro‘yxatidan o‘tkazildi. Bu haqda Adliya vazirligi Intellektual mulk departamenti matbuot xizmati xabar berdi.
Qashqadaryo viloyatida birinchi bo‘lib davlat ro‘yxatidan o‘tkazilgan ushbu geografik ko‘rsatkichdan foydalanish huquqini tasdiqlovchi guvohnoma uning egasi, yaʼni G‘uzor tuman hokimligiga guvohnomada ko‘rsatilgan tovar turiga nisbatan foydalanish huquqini beradi.
Mazkur geografik ko‘rsatkich guvohnomasi viloyat adliya boshqarmasi boshlig‘ining birinchi o‘rinbosari A.Isoqov tomonidan O‘zbekiston Qurolli Kuchlari tashkil etilganining 32 yilligi tadbiri doirasida G‘uzor tuman hokimi Bekzod Suyunovga tantanali ravishda topshirdi.
Tuman hokimligi matbuot xizmati xabarida qayd etilishicha, geografik ko‘rsatkichlar sonining oshishi hududlarda turistik oqimning ko‘payishiga, “gastronomik turizm”ni rivojlantirishga va umuman, hududlarning turistik jozibadorligini oshirishga yordam beradi.
O‘zbekistonda bundan avval “G‘ijduvon shashlik”, “Zomin tandir go‘shti”, “Marg‘ilon adrasi” va “Qo‘qon pichoqlari” patentlangandi.
Izoh (0)