Toshkent shahrida lavash va kartoshka fri yedirilgani uchun ichagi chirigan 10 oylik chaqaloq operatsiya qilindi. Bu haqda “Millar” dasturida xabar berildi.
Qayd etilishicha, olis viloyatdan Toshkent shahriga kelayotgan ona yo‘ldan tushlik uchun lavash va qovurilgan kartoshka sotib olgan. Yig‘lab, xarxasha qilgani uchun ayol o‘ziga olgan fastfudni og‘zida chaynab, 10 oylik chaqalog‘iga ham yedirgan. Oradan ma’lum vaqt o‘tib, go‘dakning ahvoli og‘irlashgan.
Shifokorning bildirishicha, chaqaloqda ko‘p marotaba qayt qilish, ichidan qon ketish, qorni dam bo‘lishi va doimiy og‘riqlar kuzatilib kelgan. Ichak chirishi sababli endilikda bir nechta operatsiya bajarilishi kerak. Birinchi bosqichda ichakning chirigan qismi olib tashlangan va ichak stomasi chiqarib qo‘yilgan. Bu stoma bilan chaqaloq 6 oycha yashab turadi, keyin yana operatsiya qilinadi va ichak tiklanadi.
Xabarda aytilishicha, Respublika shoshilinch tibbiy yordam ilmiy markazi Bolalar jarrohligi bo‘limiga bolalar ichagi ishdan chiqishi bilan bog‘liq murojaatlar tez-tez kelib tushadi. Ayrimlar bilmagan holatda chaqaloqlarga dumba yoki ko‘k somsa berib qo‘yishi holatlari ham kuzatilgan. Shunday holatlar ayanchli oqibatlarga olib keladi.
Aslida 3 yoshgacha bo‘lgan bolalarni ona suti bilan oziqlantirish lozim. 1 yoshdan o‘tgandan keyin esa qo‘shimcha ozuqa berish mumkin.
Izoh (0)