Madridning “Real” klubi jamoaning asosiy hujumchilaridan biri — Vinisius Juniordan ijtimoiy tarmoqlardagi g‘alati harakatlari bo‘yicha tushuntirish talab qildi. So‘nggi kunlarda futbolchining Instagram sahifasida bir qator o‘zgarishlar kuzatildi: Chempionlar Ligasi sovrinlari bilan tushgan suratlar o‘chirildi, shuningdek, profil biografiyasidan “Real Madrid” futbolchisi ekani haqidagi yozuv ham olib tashlandi.
El Chiringuito nashrining xabar berishicha, klub ushbu holat yuzasidan rasmiy ravishda Vinisiusdan izoh so‘ragan. Futbolchining vakillari esa bunday o‘zgarishlar sahifani futbolchining o‘zi emas, balki ijtimoiy tarmoqlar bilan shug‘ullanuvchi maxsus agentlik yuritishi sabab yuzaga kelganini bildirgan.
Shundan so‘ng futbolchining sahifasidagi suratlar tiklandi, biroq bu voqea futbol jamoatchiligi orasida katta shov-shuvga sabab bo‘ldi. Bir qator ommaviy axborot vositalari va futbol sharhlovchilari bu holatni Vinisiusning yozgi transfer oynasida klubni tark etishi mumkinligi bilan bog‘lashmoqda.
Ijtimoiy tarmoqlarda yana bir taxmin bildirilmoqda. Ya’ni “Real” Klublar o‘rtasidagi Jahon chempionatining 1-tur uchrashuvida “Al-Hilol” bilan 1:1 hisobida durang o‘ynadi. Ushbu bahsda Vinisius eng yomon harakat qilgan futbolchilardan biri bo‘ldi. Shundan keyin unga ko‘plab tanqidlar bo‘ldi. Ammo hozircha futbolchi nega bunday harakat qilganining aniq sabablari ma’lum emas.
Izoh (0)