Jazirama kunlar ham boshlandi. Bu esa o‘tgan qish-bahor davrida namoyish etilgan koreys kinematografiyasining eng qiziqarli loyihalarini eslab o‘tish uchun ajoyib imkoniyatdir. Oldinda sizni 2025-yilning birinchi yarmidagi eng sara doramalar kutmoqda.
“Hayot senga mandarin bersa”
- Janr: drama, tarixiy, romantik.
- Qismlar soni: 16 ta.
- Bosh rollarda: Ayu (Li Ji-in), Pak Po-gom, Mun So-ri va boshqalar.
Seialda bolaligidanoq isyonkor tabiatga, kitoblarga muhabbatga va shoira bo‘lish orzusiga ega bo‘lgan Cheju orolidagi E Sun ismli kambag‘al qizning hamda doimo uning yonida bo‘lib, qo‘llab-quvvatlab kelgan Kvan Sik ismli kamgap, mehnatkash yigitning sevgisi hikoya qilinadi.
“Travmatologiya markazi”
- Janr: drama, tibbiyot.
- Qismlar soni: 8.
- Bosh rollarda: Chu Ji-hun, Chu Yong-u, Ha Yong va boshqalar.
Seulda og‘ir jarohatli bemorlar soni tobora ko‘paymoqda, chunki ko‘plab shifoxonalar ularni qabul qilishdan bosh tortmoqda. Janubiy Koreya sog‘liqni saqlash vaziri bunday inqiroz o‘zining kelajakdagi siyosiy rejalariga salbiy ta’sir ko‘rsatishi mumkinligini anglab, turli hududlarda ishlagan va hozirda Seuldagi shifoxonalardan birining travmatologiya bo‘limini boshqarishi kerak bo‘lgan iste’dodli travmatolog Pek Kan-hyokdan yordam so‘raydi.
“Zaif qahramon 2”
- Janr: drama, jangari.
- Seriyalar soni: 8.
- Bosh rollarda: Pak Chi-xun, Ryoun, Chxve Min-yon va boshqalar.
Birinchi mavsumdan so‘ng, o‘rta maktab o‘quvchisi Yon Shi-in boshqa maktabga o‘tadi. U do‘stlari bilan sodir bo‘lgan fojiali voqealarda o‘zini aybdor deb bilgani uchun yangi do‘stlar orttirish va janjallarga aralashishdan o‘zini tiyadi. Biroq vaqt o‘tishi bilan Yon Shi-in uch o‘quvchi bilan do‘stlashadi: So Jun-te, Pak Xu-min va Go Xyon-tak. Tez orada ular o‘zini “Ittifoq” deb atovchi katta va shafqatsiz guruhga duch keladi.
“O‘quv guruhi”
- Janr: drama, jangari, komediya.
- Qismlar soni: 10.
- Bosh rollarda: Xvan Min-xyon, Xan Ji-in, Chxa U-min va boshqalar.
Yun Gamin namunali a’lochi o‘quvchidek ko‘rinadi: doimo maktab formasida yuradi, o‘qishni yaxshi ko‘radi, dars qoldirmaydi, o‘qituvchilarni diqqat bilan tinglaydi va barcha ma’lumotlarni yozib oladi. Biroq bilimlarni sinovdan o‘tkazishga kelganda, u har safar maktabdagi eng past natijali o‘quvchilardan biriga aylanadi. Bir kuni u tasodifan “Yusun” texnika maktabida o‘qish universitetga kirishga yordam berishi mumkinligini eshitib qoladi. Uzoq o‘ylab o‘tirmay, Yun Gamin bu ta’lim muassasasiga o‘tadi va tez orada zo‘ravonlik avj olgan joyga tushib qolganini anglaydi. O‘quvchilar o‘qish o‘rniga reytinglarini ko‘tarish uchun mushtlashadi. Shunday bo‘lsa-da, Yun Gamin chinakamiga o‘qishni xohlagan ozchilik o‘quvchilardan o‘quv guruhini tuzishga ahd qiladi. O‘z do‘stlarini maktab bezorilaridan himoya qilish uchun esa Gamin o‘zining ajoyib jang qobiliyatlaridan foydalanadi.
“Mening mukammal kotibam”
- Janr: drama, komediya, romantika.
- Seriyalar soni: 12.
- Bosh rollarda: Xan Ji-min, Li Jun-hyok, Kim Do-hun va boshqalar.
Kan Ji-yun kadrlar agentligini boshqaradi. Texnologiya kompaniyasining muhim xodimini boshqa firmaga o‘tkazish ustida ishlayotganda, u menejer Yu Yin-ho bilan tanishib qoladi. Yu Yin-ho xodimni hozirgi kompaniyada qolishga ko‘ndiradi. Biroq tajribali mutaxassisni olib qolgani uchun mukofot olish o‘rniga, u tez orada ishdan bo‘shatiladi. Yu Yin-ho qiziga yolg‘iz o‘zi g‘amxo‘rlik qilishi kerakligi sababli, yangi ish izlay boshlaydi va tasodifan Kan Ji-yunning shaxsiy kotibasi bo‘lib ishga kiradi.
“To‘qqiz jumboq”
- Janr: drama, detektiv, triller.
- Seriyalar soni: 11.
- Bosh rollarda: Kim Da-mi, Son Sok-ku, Kim Son-gyun va boshqalar.
O‘n yil oldin yuqori sinf o‘quvchisi Cho I-na amakisini o‘lgan holda topadi. Tajribali detektiv Kim Xan-sem qizni asosiy gumondor deb hisoblab, uning xotirasini yo‘qotgani haqidagi so‘zlariga ishonmaydi. Biroq tergov boshi berk ko‘chaga kirib, qotillik ochilmay qoladi. Hozirda Cho I-na tahlilchi bo‘lib ishlaydi va bir kuni g‘alati jumboqning bir bo‘lagini topib, avtoto‘xtash joyida o‘ldirilgan qizga duch keladi. Yangi qotillik va o‘tmishdagi ochilmagan ish bilan bog‘liq sirli jumboq Cho I-na hamda uni hamon qotil deb bilayotgan detektiv Kim Xan-semni kuchlarini birlashtirish va bu sirli jinoyatlarning yechimini birgalikda izlashga majbur qiladi.
Izoh (0)