Kinolokatsiyalar: koreys seriallari tez-tez suratga olinadigan mashhur joylar

Janubiy Koreya — tarix va madaniyat chambarchas bog‘langan, qadimiy binolar va tabiatining go‘zalliklari ko‘plab koreys seriallari uchun dekoratsiyaga aylangan mamlakatdir. Bu joylar nafaqat butun dunyodan sayyohlarni o‘ziga jalb etadi, balki tarixiy syujetlarni yaratishda muhim joyga ham aylanadi.

Gyonbokgun saroyi (Seul)

1395-yilda barpo etilgan bu saroy Koreya monarxiyasining ulug‘vorligi ramzi hisoblanadi. Gyonbokgun nafaqat hukmdorlar qarorgohi vazifasini bajargan, balki koreys tarixiy seriallarini suratga olish joyi ham bo‘lgan. Uning hashamatli me’morchiligi va go‘zal bog‘larini “Qirollik” va “Jekpot” kabi filmlarida ko‘rish mumkin, bu yerda saroy tarixiy voqealarning markaziy o‘rnini egallaydi.

Bukchon Xanok qishlog‘i (Seul)

Bukchon ko‘chalarida an’anaviy koreys uylari — hanoklar saqlanib qolgan bo‘lib, ularda qadimgi davr ruhini his etish mumkin. Bu yerdagi har bir inshoot Choson sulolasi tarixini o‘zida mujassam etgan. Tomoshabinlar bu qishloqni “Tokkebi” va “Del Luna mehmonxonasi” seriallarda ko‘rishlari mumkin.

Chxandokkun saroyi (Seul)

XV asr boshlarida qurilgan bu saroyning ulug‘vorligi, bugungi kungacha yaxshi saqlanib qolgani kishini hayratga soladi. Qirol oilasi bu yerda vaqt o‘tkazishni yoqtirgani sababli majmua “Qizil manjet” va “Qirol sevgisi” kabi doramalarning asosiy sahnasiga aylangan. Uning go‘zal bog‘lari va shiyponlari esa mukammal suratga olish maydoni hisoblanadi.

Buyuk Chan Gim bog‘i (Kyongido)

O‘tmish muhitini qayta yaratgan bu bog‘ tarixiy seriallarda tez-tez ko‘zga tashlanadi. Uning tabiiy manzaralari va me’moriy unsurlari “Qirolicha Chorin” va “Oy bag‘ridagi Quyosh” kabi seriallar uchun ideal lokatsiyani ta’minlaydi.

Minsok qishlog‘i (Kyongido)

Choson sulolasi avlodlarining an’anaviy turmush tarzi va madaniy urf-odatlarini ko‘rish mumkin bo‘lgan, mahalliy folklor bilan sug‘orilgan koreys qishlog‘i. Bu joy nafaqat sayyohlik uchun, balki kino suratga olish uchun ham qulay. Bu yerda “Oy bag‘ridagi Quyosh” seriali tasvirga olingan. Qishloqda tarixiy voqealarning jonli namoyishlari, shuningdek, xalq bayramlari va marosimlari o‘tkaziladi.

Suvon qal’asi (Kyongido)

XVIII asrda qurilgan Suvon qal’asi bosqinchilardan himoya vazifasini o‘tagan va YUNESKOning Butunjahon merosi ro‘yxatiga kiritilgan. Bu yerga suratga olish guruhlari tashrif buyurib, “Oy nuri” filmi singari o‘z asarlarida tarixiy urushlar muhitini aks ettirishga harakat qiladi.

Xahve qishlog‘i (Kyonsan-Pukto)

Manzilgoh muhim madaniy hudud va ahamiyatli tarixiy yodgorlik hisoblanadi. Bu yerga folklor va tarix ixlosmandlari, shuningdek, koreys dehqonlarining haqiqiy hayotini aks ettirish uchun “Pachinko” kabi seriallar suratga olish guruhlari tashrif buyuradi.

Bu noyob joylar nafaqat sayyohlarni o‘ziga jalb etadi, balki mashhur koreys seriallari uchun jonli sahnaga ham aylanadi. Ushbu me’moriy yodgorliklar tomoshabinlarga o‘tmish ruhini his qilish imkonini beradi va ularni buyuk koreys hukmdorlari hamda ozod jangchilar davriga olib boradi.