Isroil harbiylari G‘azo bo‘ylab 23 falastinlikni o‘ldirdi, ulardan kamida 11 nafari G‘azo gumanitar jamg‘armasi (G‘GJ) tomonidan boshqariladigan yordam punktlarida oziq-ovqat olishga urinayotgan bo‘lgan. Bu haqda Al Jazeera xabar berdi.
G‘azo markazidagi Al Avda kasalxonasi shifokorlari 15-iyun kuni Al Jazeera’ga xabar berishicha, aholi Netzarim koridori yaqinidagi G‘GJ obyektiga yaqinlashishga uringanida Isroil o‘qidan kamida 3 kishi halok bo‘lgan va o‘nlab odamlar yaralangan.
Rafahning Mavosi hududidagi G‘GJ yordam punkti yaqinida och falastinliklarga qarata uyushtirilgan otishmada yana 2 kishi halok bo‘lib, 50 dan ortiq kishi yaralangan. Halok bo‘lganlar va yaradorlar yaqin atrofdagi Qizil xoch kasalxonasiga yetkazilgan.
Shuningdek, 15-iyun tongidan beri Isroilning bir necha bor uyushtirgan havo hujumlari G‘azo janubida kamida 12 nafar falastinlikni o‘ldirgan. Anklav shimolidagi Beyt Laxiya shahrida isroilliklarning bir guruh odamlarga bergan zarbasi oqibatida yana 7 kishi halok bo‘ldi, deya xabar bergan shifokorlar.
Deyarli har kuni yuz berayotgan ommaviy otishmalarda o‘nlab falastinliklar halok bo‘lmoqda, G‘GJ esa qurol bilan yordam berishda ayblanmoqda.
Shanba kuni kamida 79 falastinlik halok bo‘lgan. Ularning aksariyati yordamga muhtoj aholi qatlami edi. G‘azo markazidagi Al Avda va Al Aqso shifoxonalari shifokorlari Netzarim koridori yaqinidagi G‘GJ yordam tarqatish joyiga yaqinlashishga uringan kamida 15 kishi halok bo‘lganini bildirgan.
Yakshanba kungi teraktlar bo‘yicha Isroil harbiylari tomonidan hech qanday izoh berilmagan. Jamg‘arma may oyi oxirida Isroil oziq-ovqat, dori-darmon va boshqa zarur buyumlar bo‘yicha 3 oylik umumiy blokadani qisman bekor qilganidan so‘ng G‘azoga yordam tarqatishni boshlagandi.
Al Jazeera ma‘lum qilishicha, falastinliklar G‘GJ yordam markazlarini u yerdagi takroriy hujumlarni hisobga olgan holda “qatl hududi” sifatida ko‘ra boshlagan.
G‘azo Sog‘liqni saqlash vazirligining shanba kungi bayonotida aytilishicha, G‘GJ G‘azoda operatsiyalarni boshlaganidan beri bu yerda hozirgacha kamida 274 kishi halok bo‘lgan va 2 mingdan ortiq kishi yaralangan.
Izoh (0)