Jizzax akkumulyator zavodining texnik direktori Shuhrat Umarov xorijdan O‘zbekistonga kirib kelayotgan akkumulyatorlar uchun utilizatsiya yig‘imini joriy qilishni taklif qildi. Bu haqda u O‘zbekiston Savdo-sanoat palatasi mas’ullarining elektrotexnika va avtomobilsozlik sohalaridagi tadbirkorlar bilan bo‘lgan davra suhbatida gapirdi.
Biz ancha yillardan beri akkumulyator ishlab chiqarib, avtosanoat sohasiga yetkazib beryapmiz. Endilikda katta loyihalar bo‘yicha ishlab, akkumulyatorlarimiz sonini oshirib, yangi turdagi quyosh batareyalariga mo‘ljallangan akkumulyatorlar ham chiqarmoqchimiz. Shu yerda o‘tirgan Savdo-sanoat palatasi va barcha mas’ullardan mahsulotlarimizni sotishga, eksport qilishga yordam so‘ramoqchimiz. Eng asosiy masala — biz faoliyatimizda qo‘rg‘oshin ishlatamiz. Qo‘rg‘oshin esa faqat eski akkumulyatorlardan olinadi. Bir yilda O‘zbekistonning o‘zida 2 million donadan ortiq akkumulyator qayta ishlanadi. Bizni O‘zbekistonga kirib kelayotgan akkumulyatorlarga utilizatsiya yig‘imining joriy qilinmagani o‘ylantirmoqda. Agar shuni tashkil qilsak, byudjetga ham tushum bo‘lar edi, shu sabab buni hisobga olishlaringizni so‘ragan bo‘lardik, dedi Jizzax akkumulyator zavodining texnik direktori Shuhrat Umarov.
Umarovning urg‘ulashicha, ayni kungacha O‘zbekistonda xorijdan kirib kelayotgan akkumulyatorlar uchun utilizatsiya yig‘imi joriy qilinmagan. Ammo mas’ul Jizzax akkumulyator zavodi mahsuloti uchun utilizatsiya yig‘imi bor yoki yo‘qligi haqida gapirmagan.
Izoh (0)