Жиззах аккумулятор заводининг техник директори Шуҳрат Умаров хориждан Ўзбекистонга кириб келаётган аккумуляторлар учун утилизация йиғимини жорий қилишни таклиф қилди. Бу ҳақда у Ўзбекистон Савдо-саноат палатаси масъулларининг электротехника ва автомобилсозлик соҳаларидаги тадбиркорлар билан бўлган давра суҳбатида гапирди.
Биз анча йиллардан бери аккумулятор ишлаб чиқариб, автосаноат соҳасига етказиб беряпмиз. Эндиликда катта лойиҳалар бўйича ишлаб, аккумуляторларимиз сонини ошириб, янги турдаги қуёш батареяларига мўлжалланган аккумуляторлар ҳам чиқармоқчимиз. Шу ерда ўтирган Савдо-саноат палатаси ва барча масъуллардан маҳсулотларимизни сотишга, экспорт қилишга ёрдам сўрамоқчимиз. Энг асосий масала — биз фаолиятимизда қўрғошин ишлатамиз. Қўрғошин эса фақат эски аккумуляторлардан олинади. Бир йилда Ўзбекистоннинг ўзида 2 миллион донадан ортиқ аккумулятор қайта ишланади. Бизни Ўзбекистонга кириб келаётган аккумуляторларга утилизация йиғимининг жорий қилинмагани ўйлантирмоқда. Агар шуни ташкил қилсак, бюджетга ҳам тушум бўлар эди, шу сабаб буни ҳисобга олишларингизни сўраган бўлардик, деди Жиззах аккумулятор заводининг техник директори Шуҳрат Умаров.
Умаровнинг урғулашича, айни кунгача Ўзбекистонда хориждан кириб келаётган аккумуляторлар учун утилизация йиғими жорий қилинмаган. Аммо масъул Жиззах аккумулятор заводи маҳсулоти учун утилизация йиғими бор ёки йўқлиги ҳақида гапирмаган.
Изоҳ (0)