Arnold Shvarsenegger o‘ziga eng ko‘p pul keltirgan film “Terminator” emas, balki 1988-yilgi “Egizaklar” komediyasi ekanligini ma’lum qildi. Endi Koen bilan Watch What Happens Live ko‘rsatuvida aktyor o‘shanda bir sent ham gonorar olmaganini, aksincha film daromadidan foiz olganini tushuntirdi.
Bu “Egizaklar” edi, chunki bizga umuman hech narsa to‘lashmadi — na gonorar, na maosh, dedi Shvarsenegger.
Koen “gap daromaddan foiz haqida ketyaptimi”, deb so‘raganida aktyor tasdiqladi: “Ha, aynan shunday. Bu juda yaxshi natija berdi — biz bundan katta foyda ko‘rdik”.
Shvarsenegger aniq summani aytmadi, biroq bu 40 million dollardan ko‘p ekanligini ta’kidladi. “Egizaklar” komediyasida genetik jihatdan mukammal, ammo sodda erkak o‘zining past bo‘yli, muttaham va xotinboz egizak akasi borligini bilib qoladi. Ikkinchi bosh qahramonni Denni De Vito ijro etgan.
Shvarsenegger qo‘shimcha qilishicha, “Egizaklar”ning davomi ham suratga olinishi kerak edi. Davomiy qism “Uch egizak” deb nomlanib, uchinchi aka rolini Eddi Merfi ijro etishi kerak edi. Biroq asl film rejissyori Ayvan Raytman suratga olish boshlanishidan oldin vafot etdi va loyiha amalga oshmay qoldi.
Ilgari Shvarsenegger komediya janridagi filmlarda ham rol o‘ynay olishini kinostudiyalarga isbotlash maqsadida “Egizaklar” filmida gonorar olmay ishtirok etishga rozi bo‘lganini aytgan edi. Bu qaror o‘zini oqladi: kam byudjetli film butun dunyo bo‘ylab 200 million dollardan ortiq mablag‘ to‘pladi.
Izoh (0)