Dastlab mohir bodibilder sifatida tanilgan, “Terminator”, “Yirtqich” va “Qizil jazirama” kabi ajoyib jangari filmlardagi rollari tufayli xalqaro yulduzga aylangan hamda bir necha yil davomida Kaliforniya gubernatori bo‘lib ishlagan Shvarseneggerning umumiy boyligi bir milliard dollardan oshdi. Bu haqda Forbes.kz ma’lum qildi.
76 yoshli aktyor 1970-2019-yillar orasida ingliz tilida ravon so‘zlasha olmagani tufayli rol olishda qiynalgan bo‘lsa, hozirda Shvarsenegger umumiy kassa daromadi 5,5 milliard dollarni tashkil etadigan 50 ga yaqin filmda ishtirok etgan yulduzga aylangan. Jumladan, aktyor 1988-yilda mashhur bo‘lgan “Egizaklar” komediyasidan yalpi tushumning 20 foizini (taxminan 35 million dollar) olgan.
Umumiy hisoblaganda Shvarsenegger ishtirokidagi filmlardan taxminan 500 million dollar gonorar olgan. Aktyor so‘zlariga ko‘ra, 2003-yildan 2011-yilgacha Kaliforniya gubernatori lavozimida ishlagan vaqtida esa 200 million dollardan voz kechgan.
Shvarsenegger karyerasining ilk yillaridanoq daromadini ko‘paytirish maqsadida turli biznes va loyihalarga sarmoya kiritdi. Masalan, u Kaliforniyaga ko‘chganidan ko‘p o‘tmay, bodibildingdan kelgan daromadini Santa Monikadagi turar joy sotib olish uchun ishlatdi. Shuningdek, Main Street Advisors mashhur investitsiya firmasining ilk mijozi bo‘ldi, Starbucks va Google kabi xususiy kompaniyalar aksiyalarga sarmoya kiritdi. 1996-yilda u Dimensional Fund Advisors xususiy korxonasining 5 foiz aksiyalarini sotib oldi. Bugungi kunda ushbu gigant kompaniya aktivlari 718 milliard dollarga tengdir.
2003 Foto: VOI
Albatta, Terminator qahramoni sarmoya kiritgan barcha tadbirkorlik subyektlarining faoliyati muvaffaqiyatli bo‘lmadi. 1991-yilda Shvarsenegger hamkasblari Bryus Uillis va Silvestr Stallone bilan birgalikda Planet Hollywood nomli restoranlar tarmog‘iga investitsiya kiritdi, biroq 1996-yilda gullab-yashnagan restoran uch yil vaqt o‘tib o‘zini bankrot deb e’lon qildi.
Aktyorning 2021-yilda sobiq yangiliklar boshlovchisi Mariya Shrayver bilan ajrashishi ham Shvarseneggerga qimmatga tushdi. Er-xotin nikoh shartnomasini tuzmaganligi sababli sud tomonidan umumiy mulk 50/50 ga bo‘lindi.
Izoh (0)