Toshkentda “Abu Saxiy” bozori avtoturargohining sakkizinchi qavatidan sakramoqchi bo‘lgan qiz qutqarib qolindi.
Ijtimoiy tarmoqlarda “Abu Saxiy” bozori avtoturargohining yuqori qavatidan sakrashga urinayotgan qiz aks etgan video tarqaldi. Yaqin atrofdagi fuqarolar uni qutqarishga muvaffaq bo‘lgan.
UzNews’ning poytaxt Ichki ishlar bosh boshqarmasiga tayanib yozishicha, voqea 3-iyul kuni soat 17:45 atrofida yuz bergan. 2001-yilda tug‘ilgan fuqaro M.O. oilaviy muammolar tufayli o‘z joniga qasd qilishga uringan.
Tuman ichki ishlar bo‘limlarining xotin-qizlar bilan ishlash bo‘yicha inspektorlari hamda psixologlar tomonidan u bilan suhbat o‘tkazilib, hozir u mutaxassislar nazoratida, — deyiladi xabarda.
Joniga qasd qilgan qizlar
Avvalroq Toshkent shahar Yangihayot tumanida 17 yoshli qiz o‘z joniga qasd qilgani haqida xabar qilingandi. 2006-yilda tug‘ilgan voyaga yetmagan qiz (Turkiya fuqarosi) noma’lum sabablarga ko‘ra, 6-qavatdan o‘zini tashlagan. Olgan tan jarohatlari oqibatida u shifoxonada vafot etgan.
Shuningdek, Farg‘ona viloyatining Buvayda tumanida 16 yoshli qiz o‘zini osib qo‘ygandi. Marhumaning yaqin qarindoshlari so‘nggi vaqtlarda uning ruhiyati buzilib qolgani, o‘z joniga qasd qilishida hech kimning aybi yo‘qligini izohlab, tushuntirish bergan.
Bundan tashqari, Jizzax viloyati Sharof Rashidov tumanida 18 yoshli qiz yuqori qavatdan o‘zini tashlab, joniga qasd qilgan. Voqea guvohi bo‘lgan ayolning so‘zlariga ko‘ra, marhuma o‘zini tashlashidan oldin ushbu uylar atrofiga bir necha marotaba kelib ketgan.
Izoh (0)