Тошкентда “Абу Сахий” бозори автотураргоҳининг саккизинчи қаватидан сакрамоқчи бўлган қиз қутқариб қолинди.
Ижтимоий тармоқларда “Абу Сахий” бозори автотураргоҳининг юқори қаватидан сакрашга уринаётган қиз акс этган видео тарқалди. Яқин атрофдаги фуқаролар уни қутқаришга муваффақ бўлган.
UzNews’нинг пойтахт Ички ишлар бош бошқармасига таяниб ёзишича, воқеа 3 июль куни соат 17:45 атрофида юз берган. 2001 йилда туғилган фуқаро М.О. оилавий муаммолар туфайли ўз жонига қасд қилишга уринган.
Туман ички ишлар бўлимларининг хотин-қизлар билан ишлаш бўйича инспекторлари ҳамда психологлар томонидан у билан суҳбат ўтказилиб, ҳозир у мутахассислар назоратида, — дейилади хабарда.
Жонига қасд қилган қизлар
Аввалроқ Тошкент шаҳар Янгиҳаёт туманида 17 ёшли қиз ўз жонига қасд қилгани ҳақида хабар қилинганди. 2006 йилда туғилган вояга етмаган қиз (Туркия фуқароси) номаълум сабабларга кўра, 6-қаватдан ўзини ташлаган. Олган тан жароҳатлари оқибатида у шифохонада вафот этган.
Шунингдек, Фарғона вилоятининг Бувайда туманида 16 ёшли қиз ўзини осиб қўйганди. Марҳуманинг яқин қариндошлари сўнгги вақтларда унинг руҳияти бузилиб қолгани, ўз жонига қасд қилишида ҳеч кимнинг айби йўқлигини изоҳлаб, тушунтириш берган.
Бундан ташқари, Жиззах вилояти Шароф Рашидов туманида 18 ёшли қиз юқори қаватдан ўзини ташлаб, жонига қасд қилган. Воқеа гувоҳи бўлган аёлнинг сўзларига кўра, марҳума ўзини ташлашидан олдин ушбу уйлар атрофига бир неча маротаба келиб кетган.
Изоҳ (0)