Adliya vazirligining “E-qaror” platformasiga hokimlar yordamchilarini rag‘batlantirish to‘g‘risidagi qarorlar yopiq shaklda joylanmoqda. Bu fuqarolar to‘layotgan soliqlardan davlat xizmatchisiga ajratilayotgan mablag‘lar ustidan jamoatchilik nazoratini o‘rnatishga to‘siq bo‘lmoqda.
Mazkur holat yuzasidan Adliya vazirligi mas’ul xodimi Iskandarjon Islomovning tushuntirish berishicha, mehnat va shaxsga doir qonunchilik sabab hokim qarorni ochiq e’lon qilolmaydi.
“Shaxsga doir ma’lumotlar to‘g‘risida”gi qonunga ko‘ra, shaxsga doir ma’lumotlar muayyan jismoniy shaxsga taalluqli bo‘lgan yoki uni identifikatsiya qilish imkonini beradigan, elektron tarzda, qog‘ozda va (yoki) boshqa moddiy jismda qayd etilgan axborotdir.
Shaxsga doir ma’lumotlarni nomuayyan doiradagi shaxslarga oshkor etishga, shu jumladan, OAVda ma’lum qilishga, Internet jahon axborot tarmog‘iga joylashtirishga yoki shaxsga doir ma’lumotlardan biror-bir boshqa usul bilan foydalanish imkonini berishga qaratilgan harakatlar shaxsga doir ma’lumotlarni tarqatish hisoblanadi.
Shaxsga doir ma’lumotlarni yig‘ishning ilgari bildirilgan maqsadlaridan chetga chiqilgan hollarda, ushbu ma’lumotlarni tarqatish subyektning roziligi bilan amalga oshiriladi.
Mehnat Kodeksiga ko‘ra, mehnatga oid munosabatlar sababli ish beruvchiga taqdim etilgan, xodimning, shuningdek, uning oila a’zolarining hayotidagi faktlar, voqealar va holatlar to‘g‘risidagi axborot xodimning shaxsga doir ma’lumotlaridir.
Unga xodim to‘g‘risidagi quyidagi ma’lumotlar kiradi:
- familiyasi, ismi, otasining ismi, tug‘ilgan sanasi va joyi;
- jismoniy shaxsning shaxsiy identifikatsiya raqami (mavjud bo‘lsa);
- ma’lumoti (qachon va qaysi ta’lim tashkilotlarini tugatganligi, diplomlari raqamlari, diplom bo‘yicha tayyorgarlik yo‘nalishi yoki mutaxassisligi, malakasi);
- mehnat faoliyati boshlanganidan e’tiboran bajarilgan ishlari (harbiy xizmatni qo‘shib hisoblaganda);
- doimiy yoki vaqtincha yashash joyi bo‘yicha ro‘yxatdan o‘tgan manzili;
- pasportiga oid ma’lumotlar (seriyasi, raqami, kim tomonidan va qachon berilganligi) va identifikatsiya ID-karta ma’lumotlari;
- shaxsiy telefon raqami, elektron pochta manzili;
- harbiy majburiyatga daxldorligi, harbiy ro‘yxatga olish bo‘yicha ma’lumotlar (zaxirada bo‘lgan fuqarolar va harbiy xizmatga chaqirilishi lozim bo‘lgan shaxslar uchun);
- soliq to‘lovchining identifikatsiya raqami;
- shaxsiy jamg‘arib boriladigan pensiya hisobvarag‘ining raqami;
- majburiy tibbiy ko‘rik natijalari;
- xodim bilan mehnat shartnomasini bekor qilish asoslari;
- oilaviy ahvoli, yaqin qarindoshlarining familiyasi, ismi, otasining ismi va tug‘ilgan sanalari;
- xodimning va (yoki) uning oila a’zolarining hayotidagi ish beruvchiga ma’lum bo‘lib qolgan faktlar, voqealar hamda holatlar haqidagi boshqa ma’lumotlar.
Ma’lumot uchun, xodimning shaxsga doir ma’lumotlari to‘g‘risidagi axborot maxfiy axborot toifasiga kiradi.
Izoh (0)