Адлия вазирлигининг “E-qaror” платформасига ҳокимлар ёрдамчиларини рағбатлантириш тўғрисидаги қарорлар ёпиқ шаклда жойланмоқда. Бу фуқаролар тўлаётган солиқлардан давлат хизматчисига ажратилаётган маблағлар устидан жамоатчилик назоратини ўрнатишга тўсиқ бўлмоқда.
Мазкур ҳолат юзасидан Адлия вазирлиги масъул ходими Искандаржон Исломовнинг тушунтириш беришича, меҳнат ва шахсга доир қонунчилик сабаб ҳоким қарорни очиқ эълон қилолмайди.
“Шахсга доир маълумотлар тўғрисида”ги қонунга кўра, шахсга доир маълумотлар муайян жисмоний шахсга тааллуқли бўлган ёки уни идентификация қилиш имконини берадиган, электрон тарзда, қоғозда ва (ёки) бошқа моддий жисмда қайд этилган ахборотдир.
Шахсга доир маълумотларни номуайян доирадаги шахсларга ошкор этишга, шу жумладан, ОАВда маълум қилишга, Интернет жаҳон ахборот тармоғига жойлаштиришга ёки шахсга доир маълумотлардан бирор-бир бошқа усул билан фойдаланиш имконини беришга қаратилган ҳаракатлар шахсга доир маълумотларни тарқатиш ҳисобланади.
Шахсга доир маълумотларни йиғишнинг илгари билдирилган мақсадларидан четга чиқилган ҳолларда, ушбу маълумотларни тарқатиш субъектнинг розилиги билан амалга оширилади.
Меҳнат Кодексига кўра, меҳнатга оид муносабатлар сабабли иш берувчига тақдим этилган, ходимнинг, шунингдек, унинг оила аъзоларининг ҳаётидаги фактлар, воқеалар ва ҳолатлар тўғрисидаги ахборот ходимнинг шахсга доир маълумотларидир.
Унга ходим тўғрисидаги қуйидаги маълумотлар киради:
- фамилияси, исми, отасининг исми, туғилган санаси ва жойи;
- жисмоний шахснинг шахсий идентификация рақами (мавжуд бўлса);
- маълумоти (қачон ва қайси таълим ташкилотларини тугатганлиги, дипломлари рақамлари, диплом бўйича тайёргарлик йўналиши ёки мутахассислиги, малакаси);
- меҳнат фаолияти бошланганидан эътиборан бажарилган ишлари (ҳарбий хизматни қўшиб ҳисоблаганда);
- доимий ёки вақтинча яшаш жойи бўйича рўйхатдан ўтган манзили;
- паспортига оид маълумотлар (серияси, рақами, ким томонидан ва қачон берилганлиги) ва идентификация ID-карта маълумотлари;
- шахсий телефон рақами, электрон почта манзили;
- ҳарбий мажбуриятга дахлдорлиги, ҳарбий рўйхатга олиш бўйича маълумотлар (захирада бўлган фуқаролар ва ҳарбий хизматга чақирилиши лозим бўлган шахслар учун);
- солиқ тўловчининг идентификация рақами;
- шахсий жамғариб бориладиган пенсия ҳисобварағининг рақами;
- мажбурий тиббий кўрик натижалари;
- ходим билан меҳнат шартномасини бекор қилиш асослари;
- оилавий аҳволи, яқин қариндошларининг фамилияси, исми, отасининг исми ва туғилган саналари;
- ходимнинг ва (ёки) унинг оила аъзоларининг ҳаётидаги иш берувчига маълум бўлиб қолган фактлар, воқеалар ҳамда ҳолатлар ҳақидаги бошқа маълумотлар.
Маълумот учун, ходимнинг шахсга доир маълумотлари тўғрисидаги ахборот махфий ахборот тоифасига киради.
Изоҳ (0)