Qozog‘istonning Magnum supermarketlar tarmog‘i uch yarim yillik faoliyatdan so‘ng O‘zbekiston bozorini tark etmoqda. Bu haqda Forbes Kazakhstan xabar berdi.
Ma’lum qilinishicha, riteyler qator supermarketlarini allaqachon yopgan, qolganlarida ham oxirgi tovarlar sotib tugatilmoqda.
Magnum Cash&Carry bu Qozog‘istonda 200 dan ortiq savdo nuqtasiga ega bo‘lgan, har kuni yuz minglab mijozlarga xizmat ko‘rsatadigan yirik tarmoqdir. O‘zbekiston bozoriga 2021-yil dekabrida Toshkentda ikkita gipermarket ochish orqali kirib kelgandi.
2023-yil avgustida u Majid Al Futtaim LLC Uzbekistan kompaniyasining biznesini sotib olib, fransuz Carrefour tarmog‘ining sobiq do‘konlarini o‘z balansiga o‘tkazdi. Bu orqali savdo nuqtalari soni yettitaga yetdi. Kompaniya vakillari 2024-yilda yana 10 ta savdo nuqtasini ochib, tarmoqlar sonini 17 taga yetkazishini e’lon qilgandi.
Biroq 2024-yil boshidan boshlab ushbu kengayish rejalari to‘xtagan. 2024-yil fevral oyida Toshkentdagi Magnum Qoratosh savdo nuqtasi yopildi. 2025-yil may oyida esa yana ikki savdo nuqtasi — Magnum Yunusobod va Magnum Atlas Chilonzor rasman boshqa manzilga ko‘chirilgani haqida xabar berilgan bo‘lsa-da, ular aslida yopilgan. 2025-yil 16-iyun kuni esa Magnum Samarqand Darvoza savdo nuqtasining yopilgani to‘g‘risida xabarlar tarqaldi.
EastFruit’ning yozishicha, 2025-yil 17-iyun holatiga ko‘ra, Magnum tarmog‘i O‘zbekiston hududida faqat Toshkent shahrida joylashgan uchta savdo nuqtasida faoliyat yuritmoqda.
Izoh (0)