Saudiya Arabistonidagi deportatsiya markazida saqlanayotgan O‘zbekiston fuqarolari vatanga olib kelindi. Bu haqda “Dunyo” xabar berdi.
Maʼlum qilinishicha, Bosh konsulxona, Din ishlari bo‘yicha qo‘mitasi va Uzbekistan Airways hamkorligida Saudiya Arabistonining Makka shahridagi “Ash-Shumaisiy” deportatsiya markazida bo‘lib turgan Z.Sh. va uning farzandlari qaytarildi.
Bosh konsulxona xodimlari Saudiya Arabistonidagi “Ash-Shumaisiy” deportatsiya markazi direktori Abdulatif as-Samaliy bilan ushbu oilani O‘zbekistonga yuborish bo‘yicha bir necha bor muzokara o‘tkazdi. Muzokaralar natijasida ularni O‘zbekistonga qaytarish bo‘yicha kelishuvga erishildi.
Din ishlari bo‘yicha qo‘mitasi, Bosh konsulxona va Uzbekistan Airways tomonidan Z.Sh. va uning farzandlariga ziyoratchilar uchun ajratilgan Jidda—Toshkent yo‘nalishidagi charter reysiga aviabilet sotib olib berildi. Mazkur oila 24-avgust kuni O‘zbekistonga yetib oldi.
Ushbu jarayon 30-iyuldan 30-avgustgacha eʼlon qilingan “Vatanga qaytarish” insonparvarlik aksiyasi hamda O‘zbekistonning Jiddadagi Bosh konsulxonasi tomonidan Saudiya Arabistonida bo‘lib turgan yurtdoshlarning huquq va manfaatlarini himoya qilishga bo‘lgan yondashuvning samarali natijasi ekani qayd etildi.
O‘zbekistonda joriy yil 30-iyuldan 30-avgustgacha “Vatanga qaytarish” xayriya gumanitar aksiyasi amalga oshirilmoqda. Aksiya doirasida Saudiya Arabistonida oilaviy zo‘ravonlik qurboni bo‘lgan o‘zbekistonlik vatanga qaytarilgan edi.
“Vatanga qaytarish” xayriya aksiyasidan chet ellarda og‘ir sharoitda qolgan o‘zbekistonliklarni vatanga qaytarish maqsad qilingan. Rejaga asosan, avvalo Turkiya, Rossiya, Qozog‘iston, BAA, Saudiya Arabistoni, Hindiston, AQSH va Koreyadagi deportatsiya markazlarida bo‘lib turgan ayollar va bolalar vatanga qaytariladi.
Xorijda og‘ir moliyaviy ahvolda qolgan fuqarolar konsullik muassasalari yoki Migratsiya agentligi vakolatxonalari xulosasi asosida O‘zbekistonga olib kelinadi. Vatanga qaytarilgan fuqarolarni samarali reintegratsiya qilish bo‘yicha amaliy choralar ko‘riladi. Ular davlat tomonidan taqdim etilayotgan maqsadli subsidiyalar, imtiyozli kreditlar, tadbirkorlik va o‘zini o‘zi band qilish dasturlari orqali qo‘llab-quvvatlanadi.
Fuqarolarni qaytarish bilan bog‘liq transport xarajatlari Migratsiya jamg‘armasi mablag‘lari hisobidan qoplanadi.
Izoh (0)