Rossiyaning Irkutsk shahrida qiyin vaziyatda qolgan ikki nafar o‘zbekistonlik vatanga qaytarildi. Bu haqda “Dunyo” xabar berdi.
Ma’lum qilinishicha, Rossiyaning Irkutsk shahrida og‘ir hayotiy sinovlarga tushib qolgan ikki nafar O‘zbekiston fuqarosining vatanga qaytishi ta’minlandi.
Ushbu insonparvarlik yordami O‘zbekistonning Novosibirsk shahridagi Bosh konsulxonasi tomonidan Vazirlar Mahkamasi huzuridagi Tashqi mehnat migratsiyasi agentligining Rossiyadagi vakolatxonasi bilan birgalikda amalga oshirildi.
Ularning O‘zbekistonga qaytishi uchun Irkutsk—Toshkent yo‘nalishida samolyotga chipta xarid qilib berildi. Ular 24-avgust kuni O‘zbekistonga uchib ketgan.
O‘zbekistonda joriy yil 30-iyuldan 30-avgustgacha “Vatanga qaytarish” xayriya gumanitar aksiyasi amalga oshirilmoqda. Aksiya doirasida Saudiya Arabistonida oilaviy zo‘ravonlik qurboni bo‘lgan o‘zbekistonlik vatanga qaytarilgan edi.
“Vatanga qaytarish” xayriya aksiyasidan chet ellarda og‘ir sharoitda qolgan o‘zbekistonliklarni vatanga qaytarish maqsad qilingan. Rejaga asosan, avvalo Turkiya, Rossiya, Qozog‘iston, BAA, Saudiya Arabistoni, Hindiston, AQSH va Koreyadagi deportatsiya markazlarida bo‘lib turgan ayollar va bolalar vatanga qaytariladi.
Xorijda og‘ir moliyaviy ahvolda qolgan fuqarolar konsullik muassasalari yoki Migratsiya agentligi vakolatxonalari xulosasi asosida O‘zbekistonga olib kelinadi. Vatanga qaytarilgan fuqarolarni samarali reintegratsiya qilish bo‘yicha amaliy choralar ko‘riladi. Ular davlat tomonidan taqdim etilayotgan maqsadli subsidiyalar, imtiyozli kreditlar, tadbirkorlik va o‘zini o‘zi band qilish dasturlari orqali qo‘llab-quvvatlanadi.
Fuqarolarni qaytarish bilan bog‘liq transport xarajatlari Migratsiya jamg‘armasi mablag‘lari hisobidan qoplanadi.
Izoh (0)