Rossiya va Ukraina o‘rtasida 24-avgust kuni har bir tarafdan 146 nafar mahbus almashildi. Bu haqda The Moscow Times xabar berdi.
Rossiya Mudofaa vazirligi bayonotiga ko‘ra, Ukrainada ushlab turilgan 146 nafar rossiyalik harbiy xizmatchi ozod etilgan. Buning evaziga 146 nafar Ukraina Qurolli kuchlari askari ham Ukrainaga qaytarilgan.
“Ular 2022/23-yillarda bosqinchilar tomonidan noqonuniy ravishda hibsga olingan edi”, deyiladi rus TIV bayonotda.
Rossiya tomoni, shuningdek, Kursk viloyatidan bo‘lgan, Kiyev tomonidan noqonuniy hibsga olingan 8 nafar rossiyalik fuqaro ham almashuv doirasida qaytarilganini bildirgan. Ukraina esa bu borada aniq raqamlarni tasdiqlamagan, ammo ozod qilinganlar orasida 2 nafar ukrainalik jurnalist — Dmitro Xilyuk va Mark Kaliush borligi bildirilgan. Mamlakat prezidenti Vladimir Zelenskiy ham bu voqeaga munosabat bildirib, ijtimoiy tarmoqlarda quyidagicha post qoldirgan:
“Xilyuk 2022-yil martida Kiyev viloyatida o‘g‘irlab ketilgan edi. Nihoyat, u uyida — Ukrainada”.
Chegara bilmas muxbirlar (RSF) tashkiloti asirlarning ozod etilishini olqishlab, ular jurnalistik faoliyati sabab nishonga olinganini ta’kidlagan.
“RSF ularni o‘g‘irlab, qamoqda qiynoqqa solgan shaxslarni aniqlashni va javobgarlikka tortishni talab qiladi. Hozirda Kreml qo‘lida saqlanayotgan 26 nafar ukrainalik OAV xodimi ham ozod qilinishi shart”, dedi tashkilot vakillari.
Shuningdek, Ukrainaning Xerson shahri sobiq meri Vladimir Mikolayenko ham ozod etilgani aytilmoqda. Bu haqda Zelenskiyning yordamchisi Andriy Yermak o‘zining X tarmog‘idagi sahifasida xabar bergan.
“Mikolayenko qariyb 3 yil asirlikda bo‘lgan. U 2022-yilda almashuv ro‘yxatiga kiritilgan edi, biroq o‘sha vaqtda o‘zi bilan kamerada saqlanayotgan og‘ir xastalikka chalingan mahbus foydasiga almashuvdan ixtiyoriy ravishda voz kechgan”, dedi Yermak.
Rossiya va Ukraina o‘rtasida so‘nggi marta 23-iyul kuni asirlar almashinuvining to‘qqizinchi raundi bo‘lib o‘tgandi. Unda har ikki tomonda 250 dan ortiq asirlar almashilgan. Ushbu tashabbusga 2-iyun kuni Istanbulda bo‘lib o‘tgan tinchlik muzokaralarida kelishib olingan.
Izoh (0)