Fransiya AQSHning Parijdagi elchisi Charlz Kushnerni 25-avgust kuni Tashqi ishlar vazirligiga chaqirish niyatida. Bunga elchining Fransiyada antisemitizmning kuchayishiga qarshi choralar ko‘rilmayotgani haqidagi bayonotlari sabab qilib ko‘rsatilmoqda. Bu haqda BBC xabar berdi.
Kushner — yahudiy millatiga mansub bo‘lib, AQSH prezidenti Donald Trampning qudasi hamdir (Ivanka Trampning qaynotasi). U o‘z murojaatini Wall Street Journal gazetasida e’lon qilingan ochiq maktub orqali Fransiya prezidenti Emmanuel Makronga yo‘llagan. Unda elchi G‘azo urushi boshlanganidan beri Fransiyada yahudiylarga nisbatan nafrat kuchayayotganini ta’kidlagan.
“Fransiya bu so‘nggi ayblovlarni qat’iyan rad etadi. Ularni hech qanaqasiga qabul qilib bo‘lmaydi”, deyiladi fransuz TIV bayonotida.
Kushner o‘z maktubida Makronni Isroilga nisbatan tanqidlarini yumshatishga chaqirgan va Fransiyada antisemitizm sodir bo‘layotganiga misollar keltirgan:
“Fransiyada har kuni yahudiylar ko‘chada tahqirlanadi. Ularga tegishli do‘konlar esa vandalizm nishoniga aylanadi. Hatto fransuz Ichki ishlar vazirligi ham maktabgacha ta’lim muassasalarida antisemitik holatlar qayd etilganini bildirgan”.
Shuningdek, elchi Makron va boshqa fransuz rahbarlari bilan birgalikda bu muammoga qarshi “jiddiy reja ishlab chiqishga” tayyorligini bildirgan. Fransiya Tashqi ishlar vazirligi esa Vena konvensiyasiga (1961-yil) tayanib, xorijiy diplomatlarning mamlakat ichki ishlariga aralashishi mumkin emasligini ta’kidlagan.
Kushnerning bu bayonoti Isroil bosh vaziri Benyamin Netanyaxuning o‘tgan hafta Makronga yozgan maktubidagi fikrlarni takrorlaydi. Ushbu maktubda bosh vazir Makronni Falastin davlatining xalqaro tan olinishi tarafdori sifatida antisemitizmga hissa qo‘shayotganlikda ayblagan edi.
Shu bilan birga, Makron ilgari ham antisemitizmni ochiq tanqid qilib, uni fransuz qadriyatlariga zid, deb baholagan. G‘azo bilan bog‘liq voqealardan so‘ng sinagogalar va yahudiy markazlarida qo‘riqlash choralari kuchaytirilgan edi.
Ma’lumot uchun, 2023-yil 7-oktyabr kuni HAMAS tomonidan Isroil janubiga hujum uyushtirilgan. Unda 1 200 ga yaqin odam halok bo‘lgan, 251 kishi garovga olingan. Bu voqeadan so‘ng Isroil G‘azoga keng ko‘lamli harbiy operatsiya boshlagan. G‘azodagi HAMAS boshqaruvidagi sog‘liqni saqlash vazirligiga ko‘ra, sektorda hozirga qadar 60 mingdan ortiq odam halok bo‘lgan.
G‘azo shahrida o‘tgan hafta ocharchilik rasman tasdiqlangan. Global tashkilotlar ma’lumotlariga ko‘ra, sektorda yarim milliondan ortiq aholi ocharchilik, nochorlik va o‘lim xavfi ostida yashamoqda. Isroil esa G‘azoda ocharchilik mavjudligini rad etib, bu boradagi hisobotni “butunlay yolg‘on” deb atagan.
Izoh (0)